U-Adv Thuli Madonsela ubeyimele iNingizimu Afrika elwa nenkohlakalo

MHLELI: Abaziyo bathi izwi lempofana libonwa muva.

Mangixolise kulabo okungase kwenzeke kungehli kamnandi kubona engizokusho. Ngesikhathi kusaphethe uMnu Nelson Mandela, kwafika umyalezo ngomlomo weciko, uMbongeni Ngema, owawuthi size sibabhekisise abomdabu waseNdiya.

UMbongeni wayeze ababize ngegama abanye abaholi bezombusazwe ebuza ukuthi bathule bathini izinto zibe zonakala bekhona. Yavalwa leyo ngoma kaMadlokovu ngoba kuthiwa izosusa uthuthuva.

Kwala ngisho sebememeza nkalo zonke ababevumelana noMadlokovu, bethi uyihlabe esikhonkosini, kwathiwa masehlise umoya izolungiswa.

Bheka nje Mhleli abakwaGupta, uma sifunda amaphepha kuthiwa bafika kwelengabadi ngowe-1993 njengoba sekungowezi-2018 manje kodwa bese kuyibona abese besitshela ukuthi kumele siqashe bani sixoshe bani.

Ngabe kusamele sibethembe yini abaholi bethu? Ngibona kungaba yisenzo esihle Mhleli ukuba sixolise kumfo kaMadlokovu ngokungamlaleli esixwayisa.

Ngiphinde ngibonge naku-Adv Thuli Madonsela ngokuthembeka kwakhe okungaka akwenzele iNingizimu Afrika yonkana ngokusivula amehlo sibe sithi siyabona singaboni.

Besihleli singazi ukuthi kasisaphethwe ngabengabadi, sesiphethwe ngabokufika. Ngithi Mhleli naye u-Adv Madonsela ufanelwe wukubongwa ngokumelana nokungcola.

Ukhombise ukulithanda izwe lakhe nabantu balo.

Ngabe ngiyaphosisa yini uma ngithi ma-Afrika sinenkinga yomhobholo ngoba uma ubheka wonke amazwe aseAfrika agcwele ubuphofu, kawathuthuki kungenxa yabaholi bawo abazicabangela bona nemindeni yabo?

ISITHOMBE NGABE: SABC UMFUNDI uthi kumele ahlonishwe u-Adv Thuli Madonsela ngokumelana nokungcola.