Mabaqashwe ngelokhozi abasezintanjeni zombuso
KUYIQINISO elingephikwe ukuthi ukuxoshwa kobengumengameli wezwe, uMnu Jacob Zuma, yiqembu lakhe, i-ANC, akwehlanga kahle kubalandeli bakhe, iningi labo elihlala KwaZuluNatal.
Kuyiqiniso nokuthi kubantu abaningi, cishe ezweni lonke, ukuphuma kwakhe esikhundleni emuva kweminyaka eyisi-9 ephethe lesi sikhundla, kube yinjabulo.
Empeleni abaningi bathi liphume nobomvu ngokushiya kukaMnu Zuma singakafiki isikhathi sakhe sokuba abeke phansi izintambo zombuso.
Iqiniso lithi indlela aphathe ngayo izwe uMnu Zuma, yehlukanise izwe phakathi, ethandwa ngabantu besifundazwe sakhe iKwaZulu-Natal, kodwa engasa- funwa kwezinye izifundazwe.
Ukunukwa kwakhe emacaleni enkohlakalo nokusebenzisa amandla ombuso ukuzicebisa yena, bekulokhu kumlandele njalo kwaze kwaba sekupheleni kokuphatha kwakhe isikhundla sobumengameli bezwe.
Ukuthi ukuqhubeka kwakhe aphathe izwe bekuhlukanisa abantu phakathi, kakuwona nje umbono wombhali, kodwa ngowabantu ezweni lonke.
Izinhlolovo ezimbalwa ezenziwe ngonyaka odlule nangaphambili, ziyakuveza ukuthi uMsholozi ubengasafunwa kwezinye izifundazwe.
Lesi bekuyisimo esingesihle ngoba phela umuntu ophethe isikhundla sokuba ngumengameli wezwe, kufanele kube ngoyinsika yobumbano ezweni, hhayi ohlu- kanisa abantu phakathi.
Kunethemba manje kwabaningi ukuthi ukuphela kombuso kaMnu Zuma, kusho isikhathi sokuqala kabusha nokusebenza ngokubambisana kwabo bonke abantu ezweni, kulungiswe izinkinga ezifana nokusweleka kwamathuba emisebenzi nokukhula komnotho ukuze izwe lithuthuke, isizukulwane esizayo sikwazi ukuphila impilo engcono.
Njengezakhamizi besingaboni ngasolinye ngoNxamalala, kodwa kufanele sibonge futhi sizishayele ihlombe ukuthi ushiye ngokuthula, ngaphandle kokuchitheka kwegazi njengoba kujwayeleke ukwenzeka emazweni akuleli zwekazi lethu i-Afrika.
Kule minyaka eyisi-9 edlule ephethe uMsholozi, imithetho yezwe nomthethosisekelo walo, kuke kwabhekana nezivunguvungu, abanye bethu baze baba nengebhe yokuthi labo abaphethe amandla ombuso bazophumelela ukuwunqinda amandla, izwe ligcine selibuswa ngentando yamadoda athile, hhayi ngomthetho.
Kulezi zivunguvungu izwe ebelibhekene nazo, kusize ukuba khona kwamajaji angachemile, kodwa athatha izinqumo njengoba kulawula imithetho yezwe nomthethosisekelo walo, izishoshovu zamalungelo abantu, amaqembu aphikisayo ephalamende nemithombo yabezindaba ezimele.
Zonke lezi zinhlaka zenze umsebenzi oncomekayo ukuvikela izwe emankentshaneni abehlose ukuphendula izwe lethu libe yifa labo nabangani babo. Kuthe noma lezi zinhlaka esezibaliwe zigxekwa ngabenzi bobubi, zibizwa ngamaganyana ayiziswana, zalimela iqiniso kwaze kwaba sekugcineni.
Esingakufunda kulokhu wukuthi kulesi sikhathi sokuqala kabusha, kakufanele lezi zinhlaka zicabange ukuthi umzabalazo wokulwa nenkohlakalo nokusetshenziswa kabi kwamandla ombuso ngabaphethe ukuzicebisa bona kanye nabangani babo, sekufike esiphethweni.
Okwenzeke eminyakeni edlule kufanele kube yisifundo sokuthi abasuke benikwe ithuba ezikhundleni zombuso, kufanele bahlale beqashwe ngeso lokhozi, ukuze leli lifu elimnyama esiphuma kulona lingasigubuzeli futhi ngelinye ilanga.