Belicokeme izinga emcimbini wezithandani ePeople's Park
BEKUVUNGUZA umoya wenjabulo nobumnandi emcimbini wezithandani nabangani obuseMoses Mabhida Stadium People's Park eThekwini ngoMgqibelo.
Lo mcimbi obizwa ngeLovers and Friends Concert bekungokokuqala wenzeka kulo nyaka kanti abantu bakhombise ukuwuthokozela nakuba ubungagcwalanga kakhulu.
Kulo mcimbi bekuboshelwe abaculi abehlukene abaziwa kakhulu ngokucula izingoma zothando.
Phakathi kwabaculi abebeboshelwe kubalwa uLinda Gcwensa, Mondli Ngcobo, Joocy, Afrotraction, Naima Kay, Brenda Mtambo, Dumi Mkokstad nabanye.
UMkokstad obekunguyena yedwa umculi wowokholo kulo mcimbi ukhumbuze abantu enkonzweni, eqhulula amanoni akhe nalawa aculwa emasontweni ahlukene.
Uphinde wakhumbuza abantu uSifiso Ncwane eshaya ingoma yakhe ebe yintandokazi esihloko sithi “Kulungile Baba”.
Kuthe abantu besangenwe imi- zwa yenkonzo kwangena nomfundisi Sthembiso Zondo wodumo lwezinkulumo ezakhayo washukumisa inkundla evuselela uthando kwizithandani futhi wanikeza ithemba kulabo abashimile.
Abantu bakhombise ukuyithokozela nenkulumo kaMfu Zondo njengoba eyiphethe ngokukhulekela bonke abebekhona kule ndawo.
Ngemuva komthandazo kube sekuqhuma ingoma abantu baqhubeka nenjabulo njengoba bekukhona nabasakazi besiteshi esenza inzuzo, iGagasi FM, okuyibona abebephethe uhlelo kanti abanye bebeklwebha amapuleti.
Kuvele ukuthi lo mcimbi usuzokwenzeka minyaka yonke njengoba ubuhlelwe inkampani iNUZ Events.