Kuyazinqanda nezifo ukuzivocavoca
NGENXA yokuthi ukuzivocavoca kuwumkhuba ovame ukukhuthazwa ngongoti bezempilo ukuze umuntu ahlale ewumqemane - kokunye njengengxenye yokugwema ukungenwa yizifo ezithile - namuhla sizobheka ubuhle balo mkhuba nemiphumela yawo emzimbeni.
Ngaphandle kokukwenza uzizwe uthokozile nokwenza ucansi okuhamba kahle, nakhu okunye okuhle ngokuzivocavoca: UKUGWEMA UKUZIMUKA Ukuzivocavoca njalo kungakusiza ukuba ugweme ukuzimuka ngokwedlulele. Ngesikhathi uzivocavoca, umzimba ushisa lokhu okubizwa nge- calories.
Ukuzivocavoca njalo kuhle kodwa nxa ungenazo izimfanelo zokuba sendaweni yokuzivocavoca, kungakukhathazi lokho. Uma ithuba elanele lingaveli, kuyasiza ukunyakazisa umzimba usuku lonke. Lapha sisho ukwenyuka ngezitebhisi esikhundleni sokugibela ikheshi.
Kuhle nokukhuthalela imisebenzi yasekhaya. Okusemqoka wukuba uphikelele ukukwenza njalo lokhu ukuze uthole imiphumela ebonakalayo. UKUZIVOCAVOCA KUNQANDA IZIFO Kokhathazekile ngesifo senhliziyo, ofuna ukuthoba umfutho wegazi ophezulu - kungakhathalekile ukuthi ngalesi sikhathi uzimuke kangakanani - ukunyakazisa umzimba kunciphisa uhlobo lwamafutha olubi ( triglycerides) kwenyuse oluhle olubizwa ngehigh- density lipoprotein (HDL).
Ukwenzeka kwalokhu ngesikhathi esisodwa, kusiza ekunciphiseni ingozi yesifo senhliziyo. Ezinye izinkinga zempilo ezilawulekayo kanjena wuhlangothi, wushukela (Type 2), yingcindezi, izinhlobo ezahlukene zomdlavuza namathambo. ISIMO SOMOYA ( mood) Uma uzizwa udangele noma uma kade unosuku olukudalela ingcindezi, ukuzivocavoca isikhathi esingaba yimizuzu engama-30 noma ukuhamba usheshe isikhathi esingako, kukhulula amakhemikhali ebuchosheni akwenza uzizwe ujabule futhi ukhululekile.
Kunjalo nje, uba nokuzethemba ngenxa yesimo umzimba oba yisona uma uzivocavoca njalo. UKUZIVOCAVOCA KUNIKEZA UMZIMBA AMANDLA Nalowo okhathazwe yimisebenzi yasekhaya noma ukuya ezitolo, ngokuzivocavoca njalo uyakwazi ukwenyusa amandla ezicubu zomzimba wakho.
Ukunyakazisa umzimba kunika umoya-mpilo ( oxygen) nezakhamzimba ezicutshini zomzimba, kulekelele ekwenzeni inhliziyo isebenze kangcono.
Uma inhliziyo namaphaphu akho kusebenza kahle, uthola amandla amasha okwenza eminye futhi imisebenzi. UKULALA KAHLE Ukuzivocavoca kukwenza ufikelwe wubuthongo kalula futhi ulale zwi. Kumele uqaphele kodwa ukuthi lokhu kawukwenzi uma sekusondele isikhathi sokulala ngoba ungase uqwashe - uphuze ukufikelwa wubuthongo.
UKUZIVOCAVOCA KUKHUTHAZA UMDLANDLA WOCANSI
Kozizwa ekhathele engalulangazeleli ucansi, ukuzivocavoca kuyasiza ngokumnikeza amandla kanti ukubukeka kahle kuyenezela ekubeni nesasasa lokwenza ucansi.
Ngaphezu kwalokho, kuthiwa kwabesifazane kuyawenyusa umdlandla wokulangazelela ucansi. Abesilisa abazivocavoca njalo kababi nayo inkinga yokuvuka kwenduku kunalabo abangazikhathazi ngokuzivocavoca.
UKUZIVOCAVOCA KUKWENZA UHLALE UJABULILE
Ngaphandle kokuhlomula ngempilo enhle, ukuzivocavoca kumnandi, kukunika ithuba lokuphumuza ingqondo, uke uzilibale izinkinga, uthokozele ukuba ngaphandle.
Ukungenela izifundo zomdanso, ukuhamba endle noma ukudlala umdlalo ozikhethele wona, konke lokhu kuyasiza ngokukuhlanganisa nabangani.
UMONGO WOKUZIVOCAVOCA
Ukuzivocavoca nokunyakazisa umzimba ngomsebenzi kuyindlela enhle kakhulu yokwenza uzizwe uphile kahle.
Phokophela ukuba okungenani uchithe imizuzu eli-150 ngesonto uzivocavoca ngendlela elula njengokugijima, ukuhamba noma ngokubhukuda. Faka phakathi kwalezi zikhathi ukuzivivinya ngokuqukula izinsimbi nokunyakazisa umzimba.
Hlela izikhathi zokuzivocavoca ngokulinganayo esikhathini esiyisonto. Kohlose ukunciphisa isisindo, kudingeka aqinise ekuvivinyeni umzimba. OKUBALULEKILE Kumqoka ukubonana nodokotela wakho ngaphambi kokuqala uhlelo lokuzivocavoca olusha, ikakhulukazi uma ungakaze ube ngumuntu owenzayo lo mkhuba omuhle noma uma unezifo ezingamahlalakhona ( chronic) njengoshukela, yinhliziyo namathambo. Umthombo ngabe: Mayo Clinic
ABESILISA KABABI NENKINGA YOKUVUKA KWENDUKU.