ISIZOQOSHWA IMIDLALO YE-MOTSEPE LEAGUE
SEYIZOQOSHWA imidlalo yeSouth African Football Association (Safa) ABC Motsepe League ukuzama ukunqanda inkohlakalo yokuphekwa kwemidlalo ngesizini ezayo.
ILANGA lithole ukuthi ikomidi elisingethe ezemiqhudelwano kwiSafa, lizomemezela ngokusemthethweni ngesizini ezayo ukuvumeleka kokuqoshwa kwemidlalo yalesi sigaba. ISafa izama ukulwa nokugwazelwa konondweba okuthiwa barobha ingcaca kulesi sigaba.
Nokho okubi wukuthi kukhona nezikhulu ezihlonishwa kwiSafa ezinukekayo enkohlakalweni yokuphekwa kwemiphumela.
UThomas Sadiki ophethe iMotsepe League ehhovisi leSafa kuzwelonke, uthe lesi sinqumo basithathe emuva kwesililo esiqhunyiswa yizikhulu zamakilabhu ngonondweba.
“Lokhu kuzosiza ngoba sesizokwazi nokusebenzisa nokusuke kuqoshwe ngabemithombo yezi- ndaba kwazise phambilini bekungavumelekile. Inhloso yethu wukulwa nenkohlakalo,” kusho uSadiki.
Uphethe ngokuthi baphezu komkhankaso wokuhambela izifundazwe ukuhlonza esizosingatha imidlalo yokuhlungela ukunyukela kwiNational First Division (NFD) ngokuphela kwesizini. Leli phephandaba lithole ukuthi umbango wokuphatha le midlalo ususele phakathi kweMpumalanga neLimpopo.
Imiphumela yemidlalo yeSafa KZN ABC Motsepe League imi kanje: Natal United 1, Wanderers 1; uMvoti FC 1, Durban FC 0; GWP Friends 0, Milford FC 0; KwaDukuza United 2, Ses’ Khona 0; Summerfield 1, Ladysmith 1; Pmb City 6, Drakensburg FC 1; Juventus 2, KwaMashu 2.
Imidlalo yangoLwesithathu imi kanje:
EMakhehleni: KwaMashu All Stars vs Summerfield Dynamos 15h00.
EWadley: Natal United vs KwaDukuza United 15h00.