I-ARROWS IZOWETHWESWA ETHEKWINI UMQHELE WE-MDC
ILAMONTVILLE Golden Arrows Reserves izowuthweswa phambi kwabalandeli bayo umqhele wokunqoba iMultiChoice Diski Challenge (MDC).
Abafana Bes’thende bayizingqwele ezintsha zalo mqhudelwano ngemuva kokunenebula i-Orlando Pirates Reserves ngo-2-0 izolo ngeSonto emini eMakhulong Stadium, eTembisa, eGauteng.
I-Arrows Reserves iye kulo mdlalo idinga amaphuzu amathathu ukugcotshwa njengezingqwele ezintsha. Izobhekana neBidvest Wits Reserves ngeSonto kowokugcina.
USandile Luthuli wakwaSuper- Sport, uthe izinhlelo zemidlalo yokugcina zizosongwa emhlanganweni ozokuba kusasa ngoLwesibili. I-Arrows Reserves izokuya kothekela ulwazi eSpain ngenyanga ezayo okuyingxenye yemihlomulo yezingqwele zeMDC.
Amagoli aqinisekise ukuthi i-Arrows Reserves izifaka endizeni ebheke eSpain, avalelwe nguNduduzo “Sulu” Sibiya obuye agijime esikimini esikhulu sale kilabhu.
UVusi “Kanu” Vilakazi ololonga i-Arrows Reserves, ubevele eshilo ukuthi bafuna ukunqoba umdlalo wayizolo ukugwema ukuya kowokugcina bengaphansi kwengcindezi. Le kilabhu kaMato Madlala ingeyokuqala ukunqoba iMDC kabili. IBloemfontein Celtic Reserves ebibangisa i-Arrows Reserves ingaqeda inamaphuzu angama-31 uma inqoba umdlalo wokugcina. I-Arrows Reserves isivele inamaphuzu anga-32 okukhomba ukuthi kayikho ikilabhu ezoyifica ngesibalo samaphuzu.
Isiyonke imiphumela yeMDC imi kanje: Cape Town City 0, Celtic 4; Baroka 1, Chippa 0; Free State Strs 2, Sundowns 5; Arrows 2, Pirates 0; Wits 5, Ajax 1; Chiefs 4, Platinum 2, AmaZulu 0, Pmb United 1.
Umdlalo weSuperSport Reserves nePolokwane City Reserves uzokuba kusasa ngo-12 emini eLucas Moripe Stadium, eTshwane.