I-EAGLES IHLABEKE UMXHWELE NGOMASIBUSANE ZONGO
IHLOMA ngabadlali abanesipiliyoni iRoyal Eagles ecazelane amaphuzu noThongathi FC kuba ngu-11 koweNational First Division (NFD) ngoMgqibelo eHarry Gwala Stadium, eMgungundlovu.
Igoli loThongathi lishaywe nguDiyo Sibisi labulawa ngelikaDillon Solomons kulo mdlalo obekungowokuqala weligi kaRoger Sikhakhane ehlezi esigqikini sokuqeqesha i-Eagles.
ILANGA lithole ukuthi i-Eagles ilanda uRyan Chapman obekwiStellenbosch yaphinda yaboleka uMpho Mvelase obekwiChippa United ukuzama ukuqinisa isikwati sayo.
USikhakhane uncome kakhulu uMasibusane Zongo ( osesithombeni) ngeqhaza alibambile ekutheni i-Eagles ithole iphuzu kulo mdlalo oke wamiswa ngenxa yesixakaxaka kubonakala indoda obekungaqondakali ukuthi yenzani emuva kwepali lapho bekuvimbe khona unozinti we-Eagles.
“Ngijabule kakhulu ngendlela uZongo adlale ngayo. Igoli lakhiwe nguyena. Ubewuhlupho olukhulu ezitheni zethu. Ngicabanga ukuthi lokhu kuyisiqalo esihle njengoba eke wabhekana nezinkinga phambilini. Ngeke ngimfake ingcindezi kodwa ngizomncenga nje kancane,” kusho uSikhakhane.
Lo mphumela ujabulise nezikhulu zale kilabhu eziholwa nguSbu noShawn Mpisane.
IBlack Leopards isayinise uTumisang Matlholwa oke wagijima kwiRoyal Eagles phambilini. Kungena eleLeopards nje, ihlule iMbombela United ngo-2-0 ngoMgqibelo eLimpopo.
Isiyonke imiphumela yemidlalo yeNFD imi kanje: Stellenbosch 1, Ubuntu 1; Cosmos 0, Highlands 4; Super Eagles 1, Spurs 1; Cape Town All Stars 3, Tshakhuma 1; Royal Eagles 1, UThongathi FC 1; Real Kings 1, Richards Bay FC 0; Mthatha Bucks 1, Pretoria University 1; Black Leopards 2, Mbombela United 0.