BATHOBE INHLIZIYO YOMQEQESHI WE-KINGS
ABADLALI beReal Kings bathobe inhliziyo yomqeqeshi wale kilabhu bemunqobela umdlalo omqoka ekubeni eye kuwona iphukile njengoba egingqikelwe yimoto.
IKings iguqise iRichards Bay FC ngo-1-0 koweNational First Division (NFD) ngoMgqibelo ntambama eKing Zwelithini Stadium, eMlazi.
Igoli okunqobe ngalo iKings libekwe enethini nguNeverdie Makhubela ongene ngesiwombe sesibili sekusele imizuzu eli-10 umdlalo uphele.
USimo “Govuza” Dladla ongumqeqeshi weKings, uye kulo mdlalo inhliziyo yakhe ibuhlungu njengoba ikhumbi yakhe ethutha umphakathi KwaNyuswa igingqike yaphela ngoLwesine ingenabagibeli. Umshayeli ubehamba yedwa futhi naye akazange alimale.
ILANGA likhuluma noDladla uthe: “Abafana bami bangijabulisile ngokunqoba lo mdlalo yize ngiye kuwona inhliziyo yami ibuhlungu emuva kokugingqikelwa yimoto. Ngikholwa wukuthi lo mdlalo bekufanele siwunqobe ngo-3-0.
Sakhe amathuba amaningi amanye awo kuphoxile ukuthi angashwetshwa ngumdlali ogijima kulesi sigaba.”
Uqhube ngokuthi akalilahlile ithemba lokuthi basengayigudluza iHighlands Park esicongweni.
Ebuzwa uDladla ukuthi ngabe iKings isiqashe uZipho Dlangalala obecija iRoyal Eagles yini, emuva kokuba leli phephandaba lizithele kubona ngoLwesihlanu ntambama e-Edgewood College ngaseWestmead lapho kujima khona iKings, uthe:
“Okwamanje usangilekelela nga-masu athile ngoba unesipiliyoni kulo mdlalo.
"Mhlawumbe kungenzeka agcine esesebenza nathi ngokugcwele ngeke ngazi.”
UMenzi Hlophe ongumgadli weBay, uthi ubazwise ubuhlungu lo mdlalo kwazise bese bezitshela ukuthi bazogoduka nephuzu. Uthi okubi kakhulu wukuthi basendaweni embi, emngceleni wezembe.