UMGADLI WE-PSL UBIZE ABALANDELI EZIKETINI ZONINA
UZITHELE ngelikhulu ihlazo umdlali ohlonishwayo kwiPremier Soccer League (PSL) ethuka ngenhlamba esabekayo abalandeli abebemjabulela emuva komdlalo we-Absa Premiership.
ULehlohonolo “Major” Majoro ( osesithombeni) ongumgadli weBidvest Wits ushaqise abaningi ebiza ngaphansi kweziketi zonina abafanyana abebecela ukuthatha naye izithombe emuva kokuba ezakhe ziqumbe phansi iLamontville Golden Arrows ngo-2-1 koweligi ngoMgqibelo ntambama ePrincess Magogo Stadium, KwaMashu.
Laba bafanyana babonakale benyobozela emuva kokuthukwa, basuka kancane phezu komhhume ophuma abadlali enkundleni nxa sebebheke ezindlini zokushintshela.
UMajoro uthathwe ngesinye sezikhulu zeWits sahamba naye emuva kwalesi sigameko esenzeke ngesikhathi izintatheli zimatasa zikhuluma noClinton Larsen ocija i-Arrows.
ILANGA lihluleke lancama ukumthola uMajoro ukuzwa ukuthi yini lena emdine kangaka ngalaba bafanyana okwenze wabaphoxa ngalolu hlobo.
Nangesikhathi esefonelwa izolo ngeSonto ucingo lwakhe belungangeni.
Nokho uGavin Hunt opheka iWits ubeshilo ukuthi bazothatha uhambo olubheke eMauritius emdlalweni weCaf Cha-mpions League abazowugijima ngoLwesithathu. Bazodlala nePamplemousses SC abayiguqise ngo-2-0 emlenzeni wokuqala obukuleli ngeledlule. Kwenzeka konke lokhu nje, le kilabhu isanda kulanda uCosta Bellos obeyimenenja yeRoyal Eagles egijima kwiNational First Division (NFD). UBellos akathandanga ukucacisa ngesikhundla asesiphethe kwiWits enqobe i-Arrows ngamagoli kaGabadihno Mhango elingene ngomzuzu wama-29 nelikaMajoro ngowama-42 kuyiphenathi.
Elokubika le-Arrows lize noLimbikani Mzava ngowama-75.
Kulo mdlalo i-Arrows ithole amaphenathi amabili kodwa uKnox Mutizwa wayishweba eyokuqala ngomzuzu wama-60.
Lo mdlalo ubuphethwe nguVictor Gomes abaqeqeshi bala makilabhu abangagculisekanga ngezinqumo zakhe yize bengafunanga ukumgxeka bukhoma ukubalekela amazinyo abushelelezi.
Ukhiphe ngamakhadi abomvu uJabu Shongwe we-Arrows noJames Keene weziTshudeni.