ISEXWAYISO ESISHUBILE NGE-SOWETO DERBY

BAZOGCINWA esikwatini esikhulu seLamontville Golden Arrows abadlali asebephelelwe yisikhathi seminyaka yobudala yokudlala kwiMultiChoice Diski Challenge (MDC).

I-Arrows Reserves igcotshwe njengezingqwele ezintsha zeMDC ngeledlule ngemuva kokuhlula i-Orlando Pirates Reserves ngo-2-0 wamagoli kaNduduzo Sibiya.

Kubadlali be-Arrows Reserves kukhona abangeke besakwazi ukugijima kwiMDC ngesizini ezayo ngenxa yeminyaka yobudala.

UVusi Vilakazi ongumqeqeshi we-Arrows Reserves, uthe iningi labadlali beMDC liyingxenye yesikimu esikhulu esilolongwa nguClinton Larsen osizwa nguMandla Ncikazi.

Ingxenye yabadlali besikwati seArrows esidlala kwiSAB League izogijima kwiMDC ngesizini ezayo. Izikwati ze-Arrows zijima ndawonye okwenza kube lula kuLarsen ukuthatha abadlali beMDC ababophele emidlalweni ye-Absa Premiership.

I-Arrows Reserves izonikwa inkomishi yeMDC ngemuva kokushukana neBidvest Wits ngeSonto ngo-13h00 eKing Zwelithini Stadium, eMlazi.

Lo mdlalo uyingxenye yehambisana nomcimbi wobumnandi wokusonga isizini yalo mqhudelwano.

I-Arrows Reserves izosingatha uhlelo lokujima phambi kwabezindaba namuhla ngoLwesine ekuseni ngaphambi kokubamba isithangami nabezindaba.

Abalandeli bazongena mahhala ngeSonto kodwa bayanxuswa ukulanda amathikithi eKing Zwelithini Stadium kusasa ngoLwesihlanu nangoMgqibelo ngo13h00 kuzona zombili izinsuku.

Umphakathi waseMlazi uzophinde uzitike ngokubuka iBloemfontein Celtic igadulisana neMaritzburg United ngo-9 bese kugijima iKaizer Chiefs namaZulu ngo10 bese kuvala i-Arrows neWits ngo-13h00.

Yomithathu le midlalo izoboniswa bukhoma kwiSS4 naseziteshini zomphakathi ezitholakala kwiDSTV.

Isiyonke imidlalo yokusonga isizini yeMDC ihlelwe kanje: NGESONTO EKing Zwelithini Stadium: Maritzburg United vs Celtic 09h00 (SS4), AmaZulu vs Chiefs 11h00 (SS4), Arrows vs Wits 13h00 (SS4).

EGugulethu: Cape Town City vs Free State Stars 10h00.

ELucas Moripe: SuperSport United vs Baroka 10h00.

E-Ikamva: Ajax Cape Town vs Mamelodi Sundowns 12h00.

ERoyal Bafokeng: Platinum Stars vs Polokwane City 12h00.

EWolfson Stadium: Chippa United vs Orlando Pirates.