Kubi esalukazini esigenciwe
Ngokudembesela Umndeni usola amaphoyisa
KUBONWA ngokusa esibhedlela kowesifazane osekhulile waseKuthuleni, eMelmoth, okusolwa ukuthi uklajwe ngecelemba yizihlobo zakhe zimnuka ngokuthi uyathakatha.
UNkk Babhekile Shandu (73) ungenelwe ngabantu esemzini wakhe elele mhla zimbili kule nyanga, bamklabha bamshiya bezitshela ukuthi ufile.
Umndeni wakhe usola amaphoyisa ngokudembesela ukusukumela lolu daba ngesikhathi uNkk Shandu ewabikela okokuqala ngabantu abebemsola ngokuthi uyathakatha baze bamhlasela emzini wakhe.
ILANGA likhulume nendodakazi kaNkk Shandu, uNkk Nkosinathi Khanyile, ethi unina ubenukwa ngokuthakatha ngezinye izihlobo zakhe. Uthi bese zimhlasele izikhathi eziningi zizama ukumbulala. Bawabikele amaphoyisa ngokuhlaselwa kwakhe kodwa angathatha zinyathelo.
“Okusikhathaza kakhulu siwumndeni wukuthi umama ubehlale ewabikela amaphoyisa ngezinsongo abezithola kulezi zihlobo zethu. Nangesikhathi zimhlaselile, uwabikelile kodwa kawazange alusukumele lolu daba.
“Nakulesi sigameko samanje, umphenyi wecala simtshelile ukuthi ngobani abantu esibasolayo kulesi sigameko kodwa kuze kube yimanje amaphoyisa kawakayi ukuyophenya abasolwa,” kusho uNkk Khanyile.
Utshele leli phephandaba ukuthi unina uhlala kubo nomuntu abamqashile ukuthi ababhekele yena ngenxa yokuthi usekhulile, kunezinto okungaselula ukuba azenzele zona.
“Ngosuku ahlaselwe ngalo, umuntu ogada umama ubegodukile. Ngenhlanhla kunentombazane ebesiyicelile ukuba iyolala ekhaya ngoba sibalekela khona ukuba asale yedwa, ifike ekhaya sekuhwalele.
“Siyasola ukuthi abahlaseli kabayibonanga intombazane, bebezitshela ukuthi umama ulele yedwa. Baqale bagqekeza endlini enesigubhu sikagesi bawucisha” kusho yena.
Uthi baqonde ekamelweni unina alala kulona bamklabha bamshiya bezitshela ukuthi ufile.
UNkk Khanyile uthi ngaphambi kokuba abasolwa bangene ekamelweni abelele kulona unina, ukwazile ukumshayela ucingo amazise ukuthi kunabantu abagqekezayo endlini makamzamele usizo ngokushesha.
“Ngifonele umfowethu oseduzane ngimtshela ukuthi makaphuthume ekhaya kunabantu abahlasela umama. Ngibe sengishayela namaphoyisa nawo azithathele isikhathi sawo ukufika. Afike abasolwa sebeshaye bachitha, umama eselimele kanzima. Kuma-nje isimo sakhe kasigculisi esibhedlela ngendlela alimale ngayo,” kusho uNkk Khanyile.
Okhulumela amaphoyisa KwaZulu-Natal, uLt Col Thembeka Mbhele, uthi likhona icala elivuliwe lokuzama ukubulala.
Uthi kunabasolwa abathathiwe ngoLwesibili beyophoswa imibuzo, badedelwa.