ISilo siphumela obala ngoZuma
ISILO samaZulu, uZwelithini kaBhekuzulu, siphumele obala okokuqala mayelana nesizathu sokuhlangana noMnu Jacob Zuma, obekunokuqagela ukuthi ubeyocela ukwesekwa ukuze angehliswa esikhundleni sakhe sobungameli bezwe.
NgoMsombuluko iSilo ngesikhathi sihlangene namakhosi oNdini, sithe uMnu Zuma ubeyobika kusona ukuthi usesithathile isinqumo - mayelana nesikhundla sobungameli - yize singachazanga ukuthi sinqumo sini leso.
Sithi uthe uthathe lesi sinqumo ngoba esaba ukuthi kungaze kuchitheke igazi eNingizimu Afrika egameni lakhe.
Kuzokhumbuleka ukuthi uMnu Zuma ukuvakashela kwakhe iSilo kushiye imibuzo eminingi.
Bekukhona abathi ubizwe yisona siyomcebisa ngamaqhinga okuphunyula otakwini abekade ebhekene nalo, kanti abanye bebethi ubeyocela amabutho ukuba ameseke ukuze angehliswa esikhundleni singakafiki isikhathi.
UMnu Zuma umemezele ukwesula kwakhe esikhundleni emuva kokuba ekade ebonakale esigodlweni seSilo.
UMnu Zuma uphume esihlalweni ebalisa, ethi akanikwanga izizathu zokushenxiswa kwakhe.
Kube sahlayana nokho ngesikhathi uMnu Bheki Cele, oyilungu lesigungu esiphezulu seANC, ngesikhathi ekhuluma namalungu aleli qembu e-Eastern Cape ngeledlule ethi kuyabaxaka ukuthi uMnu Zuma angafuna izizathu zokukhululwa esikhundleni kodwa akazifunanga ngesikhathi ebekwa.