Luyashuba 'olokunikezana' izikhundla
UMnu Mathonsi uthi unabo ubufakazi obuphathekayo ngakushoyo
UYAJIYA udaba lwezinsolo zenkohlakalo ezesabisayo yokunikezana ngezikhundla ngokobungani, kwiSouth African Democratic Teachers' Union (Sadtu), ILANGA elibike ngayo ngoMsombuluko. NgoLwesibili iSadtu KwaZuluNatal ibize isigcawu sabezindaba ifuna ukucacisa ngencwadi ebhalwe ngobengunobhala wayo, uMnu Mbuyiseni Mathonsi, ekhuluma ngenkohlakalo okuthiwa iqhutshwa yizikhulu zale nyunyana, ithi zaba izikhundla ngobungani.
ISadtu ikhwele yadilika kuMnu Mathonsi ithi izinsolo azibhekise kuyona ziwukuyihlasela. Unobhala wale nyunyana kulesi sifundwazwe, uNkz Nomarashiya Caluza, uthi uMnu Mathonsi washiya kwiSadtu ngowezi-2014 eseyosebenzela ihhovisi lika-ndunankulu.
“Eshiya esikhundleni sakhe, ubefuna ukukhetha abantu bakhe ukuba bahole le nyunyana ukuze akwazi ukubalawula yize esephumile, okuthe uma kungenzeki, waba yisitha seSadtu. Kuthe noma esephumile esikhundleni, kodwa wangayeka ukuhamba exova abantu benyunyana.
"Njalo uma kuzoba nengqungquthela yokukhetha ubuholi, ubumthola esegxambukela ekhuluma ngokufanele bakhethwe. Le nyunyana ngeke ize ikuvumele ukulawulwa ngabantu abathile, abangekho kuyona, abebenikiwe isikhathi sokuyihola kodwa bakhetha ukushiya.
"Sekuyisikhathi sokuba abantu bazibuze ukuthi kwenziwa yini umuntu obese ekuhulumeni ezikhundleni eziphezulu afune ukubuya azoba nguthishanhloko wesikole kungekho olubi ahlose ukulwenza. Sikholwa wukuthi ulambele ukuphatha noma kuqokwe abaholi abazothatha imiyalelo yakhe esingeke sikuvumele,” kusho uNkz Caluza.
ElangoLwesibili lishone uMnu Mathonsi esephendulile esitatimendeni seSadtu. Empendulweni ayibhalele ILANGA uMnu Mathonsi, uthe udaba lwenkohlakalo ulukhulume noNkz Caluza ngqo, kuyaxaka ukuthi kungani engabuyeli kuyena nempendulo, kunalokhu wagijima wabiza izintatheli waphendula kuzona.
Ephendula uNkz Caluza, uMnu Mathonsi uthe: "Ngikuphonsela inselelo Nkz Caluza nesigungu sonke sesifundazwe (seSadtu) ukuba nivule inkundla sikhulume ngale nkohlakalo njengoba nginabo bonke ubufakazi obuphathekayo. Kuleyo nkundla ngeke ngigcine ngokuveza inkohlakalo, kodwa ngizokukhombisa ukuthi unehlula kanjani umsebenzi njengoba namanje kusenothisha abasebenza sekuphume isikole nangezimpelasonto befundisa kodwa abanganikwa lutho ngalokho.
"Kungani othisha abesulile bangabe besavunyelwa ukuphinda bayofundisa? Kungani othisha abangafundanga ngomfundaze weFunza Lushaka benganikwa umsebenzi kodwa kuqashwe labo abafunde ngomfundaze kuphela?
"Lezi yizinto okumele ngabe niyazisukumela njengenyunyana yothisha kodwa nilibele yizinto ezingathi shu, ukufakana ngetiye ezikhundleni. Ngicela uvume Nomarashiya ngikunike ubufakazi bale nkohlakalo, ungalokhu ukhuluma kwabezindaba.
"Ngiyazi ungesabisa okwenyoka,” kusho uMnu Mathonsi. UNkz Caluza ekhuluma neLANGA, uthe udaba lokuhlambalazwa nguMnu Mathonsi sebelufake kubameli beSadtu, naye uMnu Mathonsi uthe usevule icala ngenkohlakalo eyenziwa yile nyunyana.
Uthe ulivule ngoLwesibili eDurban Central Police Station. Okhulumela amaphoyisa KwaZuluNatal, uColonel Thembeka Mbhele, uthi emarekhodini abo kaliveli icala lenkohlakalo elivuliwe.