Ibhekene ngeziqu kumqashi nezisebenzi
Bathi usevele waqasha abanye
IJAMELENE phakathi kwezisebenzi zePG Labour Hire Construction nomqashi wazo njengoba sekuphele inyanga zitelekile zifuna ukwenyuselwa amaholo ngama-25%.
IPG Labour Hire iqashwe yimayini iGoedehoop Colliery, eFarm Goedehoop, esifundazweni iMpumalanga. Izisebenzi zayo zithi sezikhathele wukudlala umqashi njengoba sekuphele iminyaka engazikhuphuleli amaholo. Isimo besishubile ngoLwesihlanu olwedlule. Kushiswe imijondolo emithathu ehlala ezinye izisebenzi ezisolwa ngokuqhubeka nokusebenza yize lezi ezinye zitelekile.
Iningi lalezi zisebenzi ezingamalungu e-Associated Mineworkers and Construction Union (Amcu), lithi sekuphele iminyaka engaphezulu kweyisi-7 lihola amakinati. Lihola u-R5 900 ezinye zingaphansi kwalokhu. Ngokuthola kweLANGA, lezi zisebenzi zithi zifuna ukwenyuselwa imali ngo-R1 500. Esinye sazo esikhulume neLANGA ngombandela wokuba singadalulwa igama laso, sithi okuziphatha kabi wukuthi umqashi akazilaleli, useqashe abanye ukuba basebenze okuyinto ezicasula kakhulu.
“Ngineminyaka eyisi-7 ngisebenza kule nkampani kodwa imali yakhona inyuka kancane. Njalo ngonyaka sifakelwa u-R1 kuphela eholweni kanti umsebenzi esiwenzayo unzima," kusho isisebenzi. Sithi umqashi uthe akanayo imali abayifunayo.
"Kuyasixaka ukuthi uyakwazi ukukhipha imali akhokhele abanye abantu abaqashile njengoba sitelekile," esho. UMnu Isaac Mdluli naye oyingxenye yalesi siteleka, uthi okunye abakufuna kumqashi wukubanyusela nemali yokukhokhela izindawo zokuhlala njengoba ebanikeza u-R400 kuphela, bafuna ibe wu-R1 000 ngoba bakhokha kakhulu lapho behlala khona.
“Ngonyaka ophelile sike sateleka sikhala ngamaholo, wathi uzosinika u-5% kuphela, esikuthatha njengokusichwensa. Le mali athi uzosinika yona ngeke yenze mehluko, sifuna okungenani u-R1 500 sekuhlangene neyezindawo zokuhlala,” kusho uMnu Mdluli.
Ethintwa umqashi owalile negama lakhe, uthe akukho okuningi azokusho ngaphandle kokuthi zikhona izisebenzi eziqhubeka nomsebenzi. Uthi laba abatekile bayigcosana futhi akanayo le mali abayifunayo. “Bathi bafuna ngibenyusele amaholo ngo-25%, okuyinto engingeke ngikwazi ukuyenza ngoba imali kayikho.
"Ngibatshelile ukuthi ngizobanika u-5%, bawenqaba. Into abayenzayo wukungihlukumeza njengo-