NGITHINTWA NGEYOKUBEKEZELELANA KWEZINKOLO
MHLELI: Mhla zili-18 kwephezulu, ekhasini le-10 lezenkolo leLANGA
phansi kwesihloko esithi “Mazifunde ukubekezelelana izinkonzo ezahlukene,” ngithi mangibonge ngendlela abhale wayicubungula ngayo le ndaba ubaba uKnowledge Simelane.
Mangisho nje ukuthi njengoba ngisindisiwe, kungiphatha kabi ukuzwa into embi eyenziwe ngomunye wabasindisiwe.
Kayikho into engiphathe kabi njengalesi sibonelo uMagutshwa alinganise ngaso, sentombazana eyadlula emhlabeni isindisiwe kodwa umndeni ungasindisiwe.
Ake ngisho lokhu, uma umuntu amukela uJesu, kusuke sekumele kube nguyena owazisa umndeni wakhe ukuthi usezelwe kabusha, awuchazele ngenhlonipho ukuthi uma umuntu esamukele uJesu yini ayenzayo yini angayenzi ukuze uma umndeni umphoqelela ukume- nzisa into angayenzi, icala libephezu kwawo.
Uma yonke into uyenza ngenhlonipho, umndeni ugcina utheneka amandla uyibona nempilo yakho ingasafani nakuqala.
Uma engawazisanga umndeni, usuke edayisa ngevangeli ngoba uma kufika abasindisiwe sebekhuluma okuhlukile, umndeni uvele umangale, uthi siyayiqala-ke le nsindiso enifika nayo thina besinonozibanibani obesindisiwe kodwa senza naye yonke into.
Ake ngithi nje umngcwabo yinto yomndeni, yingakho nje abanye bake baze bashaywe bese bethi bashayelwe ivangeli kanti phinde bashayelwe ukwedelela.
Yiqiniso Magutshwa imizwa yomuntu kayikusebenzeli ukulunga kukaNkulunkulu, abantu kabazishayi izifuba bethi bona baphethe iqiniso.
Into engiyifundile wukuthi iqiniso yi- qiniso kulowo muntu osuke ekholwa wukuthi le nto akholwa yiyona iyiqiniso.
Akekho umuntu ohlala emangeni ewazi ukuthi angamanga.
Bonke abantu abasenkolweni abakuyona bakholwa wukuthi yiyona eyiqiniso.
Uyakudabukela nje wena uma uyisola inkolo yakhe, akubukise okomuntu okhulunyiswa wukungazi.
Ngeke kwalunga kuze kulethwe umnikazi weqiniso, kube nguyena ozohambela onembeza babantu ebazisa ukuthi yiliphi okuyilona ngempela.
Njengoba ubona abantu ngezimpelasonto bebahle, begcwele imigwaqo beya ezinkonzweni ezahlukene, imvamisa yabo bazi ukuthi baya entweni eyiqiniso. Kudingeka abantu abathumela umnikazi wendaba, kube nguyena okhanyisa nokhipha inhliziyo elitshe afake ekaMoya.