Besidla eyaseDubai, siphuza ugologo kaR46k noMaqhude
NGEMPELASONTO ngizithole ngiphuza ugologo ophathise umphimbo wami ngamahloni kuhle kwekati libanjwe lizikhulula.
Phela uma ungitshela ukuthi wake walibona ikati lizikhulula, ngizokutshela emehlweni ukuthi usenga ezimithiyo.
Lo gologo engikhuluma ngawo, ibhodlela lawo libiza u-R46 000, kanti bawubiza nge-Port Ellen 15th Release eneminyaka engamashumi amathathu nambili.
Ukuba leli bhodlela belingumuntu, bekungabe selinobhebhenene lwentshebe.
Ningakabuzi ukuthi ibhodlela elibiza le mali bengilifunani, mangisheshe ngigonyuluke ngisho ukuthi bengiliphuza emzini wenye insizwa esasifunda nayo esikoleni kudalo, ebeyaziwa ngoMaqhudayeqana.
Phela le nsizwa ngiyithole isiwuphinda okwesithathu umatikuletsheni, saba ngabangani ngase ngi- qala ukuyisiza ngezifundo, yaphasa ngalowo nyaka.
Ngihlangana nayo nje, mina bengiyothenga ukudla, kwazise phela isiqandisi besesingigqolozele emehlweni singitshela ukuthi kukhona okushodayo. Bese ngingasamboni mina ngoba phela sagcinana sisengamabhungu.
Ngizwe ngomuntu esengithinta ihlombe ebuza ukuthi yimi yini lona, ngamangala ngoba phela mina ngiyazazi, kanti kangisona isiguli saseLife Esidimeni yodumo.
Kangithandanga ukumphoxa, ngivumile nje ukuthi cha yimina lona kanti uma ethanda angahamba ayobuza uMaDlamini ethuneni lena KwaMamdekazi eMariannhill - okulapho isalukazi esingizalayo safihlwa khona.
UMaqhudayeqana ujabule okwengane ithengelwe oncamnce, wase engimema ukuba ngimvakashele.
Uma enginika idilesi, ngithole ukuthi uhlala lapho kwakhe khona izimpunyela ezinemali engasukumi phansi.
Ngimbuze ukuthi usebenzaphi. Ungitshele ukuthi kule minyaka eyisihlanu eyedlule, ubesebenzela eDubai kodwa ubuye kule nyanga edlule.
Ngase ngihlanganisa uwani nothu, kwavela amaGupta.
Uphikile kodwa wathi cha yena ubezenzela ibhizinisi nje lokuxhumanisa osomabhizinisi baseNingizimu Afrika nabakuleliya lizwe.
Ngithe uma ngifika kwakhe, ngathola isithabathaba sendlu engahlala imindeni eyishumi, kanti lapha ngaphandle bekumise izimoto zikanokusho.
Uma singena ngaphakathi ubesengimema ukuba siye egunjini lokuphuza, sithole okokuthiba ukoma.
Yilapho-ke engibonise khona amabhodlela kagologo engingakaze ngiwabone, esho nokuthi yena uthenga i- private collection kuphe- la, akathengi kula mabhodlelasitolo thina esithenga kuwona.
Ngithe uma ngithela amathotho amabili okuqala, ngashaywa wunembeza, emuva kokuthi engitshelile ukuthi leli bhodlela engilikhethile libiza malini.
Phela umholo womuntu lona, kanti iningi kalifiki nokufika kuleyo mali.
Ngithe shaqalazi, ngakhohlwa ngamahloni nonembeza. Emuva kwamadabuli amathathu, besengizikhombela ukuthi angithelele kuliphi.
Abantu abaningi abathenga izinto ezibizayo basuke befuna ukubonwa, kanti bayashesha nokukutshela amanani azo.
Naye lo mbhemu ubelokhu engitshela inani lebhodlela ngalinye kuhle kwalezi zintatheli ezimemezela ibhola kumabonakude nasemsakazweni.
Ushilo futhi ukuthi yena uphuza nongqongqoshe basephalamende, ebabiza nangamagama labo abathanda lo gologo bamatawuzeni, angakhokha imali yesikole yonyaka wonke kulezi zikole zikahulumeni zasesilungwini, kuphinde kusale ushintshi.
Ugologo ubusuzehlela ngesiphundu, kanti nami besengingasenamabhuleki njengebhasi likaPutco.
Ngizithole sengimtshela ukuthi abanye balabo ngqongqoshe aphuza nabo kuyomele baqale ukuphuza ugavini nesiqatha ngoba phela njengoba sekushintshwe umengameli, bona sebephelelwe yisikhathi njengenyama esizungezwa yizimpukane eziluhlaza.
Phela le nsizwa okuthiwa nguSilili sengathi kayibhenywa ingemthunzi wezinkukhu.
Akakuthandanga-ke lokhu ebengikusho uMaqhudayeqana, okusho khona ukuthi ngeke aphinde angimeme. Ugologo wona ngiwuphuzile, ngaze ngesaba nokuchama, hleze ngilahle le mali engaka.