UDiva usezikhiphile kweziqondene nomgosi
UFUNGA uyagomela, uthi ngeke aphinde asebenze emsakazweni ohlelweni lomgosi wosaziwayo uDiva Cadach, obesebenza kwiGagasi 99.5 FM, wagcina ekhonjwe indlela.
UDiva uthi lesi sinqumo usithathe ngemuva kokuba uhlelo lomgosi olubizwa ngeOpen Closet obelungena ngehora lesibili emini ngeSonto, luphele ngehora lesithupha, abelwenza noThando Mkhize, kwiGagasi 99.5 FM, lumqhathe nama- client akhe ngoba abengasamethembi.
Engxoxweni ekhethekile abe nayo naleli phephandaba uthe: “Angisoze ngaphindela emsakazweni ngiyokwenza uhlelo lomgosi, lungiqhathe kakhulu nabantu.
"Bebengasangethembi uma ngifika phakathi kwabo. Ngilahlekelwe yinqwaba yama- client abengasaqondi noma ngizowaphaqula noma ngiwalalele unyendle. Ngisho ngingalithola ithuba lokubuyela emsakazweni kodwa ngeke ngisaluvuma uhlelo lwemigosi.”
Uthi njengoba umsebenzi ugcine umphelele emsakazweni, akanankinga, impilo iyaqhubeka ngoba wangena emsakazweni evele ezisebenzela.
“Phela mina angikaze ngifake isicelo somsebenzi eGagasini, yibona abangithungatha bangithola, sasebenza,” kusho yena.
Sekuwumlando ukuthi iGagasi lamkhomba indlela kodwa kuze kube yimanje akafuni nokuyiphatha eyezizathu eziholele ekushiyeni kwakhe kulo msakazo.
Ujoyine iGagasi ngowezi-2016 enza lolu hlelo, okuyisigatshana sokuhlekisa ngosaziwayo ngezinto ezithile abasuke bezenzile, nokugcine kumqhathe nabanye bosaziwayo.
Phakathi kosaziwayo uDiva aseke waxabana nabo ngenxa yokubakhuluma kulolu hlelo ngumculi uNaima Kay, ahlekisa ngezindaba zakhe zothando, noSbahle Mpisane.
Ngokusho kwakhe, uthi ingxabano yabo igcine idlulile ngoba uyile kubona wayoxolisa. Njengamanje uqhubeka nomsebenzi wakhe wokuphaqula. Kosaziwayo athi sebake baphaqulwa nguyena, nguSomizi Mhlongo, uBasetsane Kumalo no-Ayanda Ncwane.