INJABULO ABENANDA FM BEHLOMULA NGEZINDONDO
UMPHATHI wesiteshi somphakathi, iNanda 88.4 FM, ozinze khona eNanda, uthi okuhamba phambili kubona wukubhekelela umphakathi nokusiza intsha ezimisele ukungena emkhakheni wezokusakaza.
UThandeka Msane ukusho lokhu ngemuva kokuklonyeliswa ngendondo yeLifetime Achievement Award, eBloemfontein, emcimbini weNational Community Radio Week Award.
Udalule ukuthi usebe kulo mkhakha iminyaka engama-20 kanti isiteshi asisingethe sibungaza eyisi-9. “Nakuba ngikuthokozela ukuklonyeliswa ngale ndondo, kodwa okuseqhulwini kimina wukubona abantu abasha bekhula befudukela emisakazweni emikhulu.
"Iningi lentsha engisebenze nayo ivuna izithelo. Ibanga esengilihambile kulo mkhakha alingivumeli ukuba ngamukele le ndondo ngokwami ngoba baningi ababe yingxenye yalolu hambo. Ngakho ngibonga angiphezi emndenini wami, ithimba engisebenza nalo emsakazweni, abaxhasi bethu nabo bonke ozakwethu kulo mkhakha.
"Le ndondo ngeyethu sonke,” kusho uThandeka. Kulo mcimbi kuphinde kwaklonyeliswa nomsakazi wayo iNanda FM, uMusa Mabika ogoduke nendondo yeBest Personality of the Year. UMabika ushayela uhlelo “Injobo ithungelwa eBandla” olungena ngo-18h00 kuya ku-20h00 ngoMsombuluko kuya kuLwesine. iNanda FM ibalwa neminye imisakazo yomphakathi ehamba phambili KwaZulu-Natal.