Uthi ufe olwembiza kushona izinkakha

UKHALA ngokushona kwezingwazi abefisa ukusebenza nazo umculi we-Afro pop, u-Afro- traction.

Leli ciko selizakhele udumo kubalandeli balo ngokubhala izingoma ezinohlonze zothando. U-Afrotraction ogama lakhe langempela nguMzwandile Moya, uthi ukuhamba emhlabeni kwezingwazi abala kuzona uHugh Masikela noRobbie Malinga uthi kumshayise ngovalo ngoba yibona abantu abefisa ukusebenza nabo.

“Umuntu engifuna ukusebenza naye manje ngokuphuthuma nguCaiphus Semenya noRingo Madlingozi. Ngifisa uNkulunkulu abagcine isikhathi eside,” kusho u-Afrotraction.

Uthi ukucula kwakhe kugqugquzelwa ngumculo kaJabu Khanyile naye ongasekho emhlabeni. Konke lokhu ukuveze engxoxweni ekhethekile abe nayo neLANGA mayelana nomculo wakhe omusha.

NgoLwezi (November) ngonyaka owedlule, ukhiphe icwecwe elisihloko sithi “Relationships”. Uthi ngaleli cwecwe uhlose ukugqugquzela izithandani. Ingoma afolosa ngayo kuleli cwecwe ithi “Asijabule”.

Usebenze nabaculi abehlukene kuleli cwecwe njengoba epike u-K.O engomeni ethi “Time for Love”, wapika intokazi yaseThekwini, uSena engomeni esihloko sithi “Siyathandana”.

Zonke izingoma zibhalwe nguyena, wazididiyela waphinde wazicula yena. Yize ezenzela yonke into kodwa uthi uyasidinga isandla somuntu wesibili ukuze umculo wakhe ungabi yinto eyodwa.

Kulo nyaka uthi uzokhipha amacwecwe amabili, ele- jazz nelomculo wokholo. Womabili lawa macwecwe azophuma ngaphansi kwenkampani yakhe, i-Afrotraction’s Records.