USEKHIPHE UMCULO OBHEKISWE NGQO EZITABANENI U-ALUTA
SESIDEDELE umculo oqondene nezitabane isilomo esesiqede iminyaka ebalelwa kweli-15 sisendimeni yezokungcebeleka esike sabonakala nakuma-Idols ngowezi-2007 sizama inhlanhla, naso esiphila yona le mpilo, u-Aluta Humbane.
Ingoma yakhe yakamuva etholakala ezitolo ze- internet ekhishwe ngesonto eledlule ngosuku lwezithandani, ithi “Nami Ngithanda Indoda”.
U-Aluta obuye ateketiswe ngeleNtombi yesigodi engawuthwali u-9 months, unomude umlando kwezokungcebeleka njengoba eqale ukugqama esebenza ukucula ePlayhouse, eThekwini, iminyaka eyisi-6 yonke, wavela nasemdlalweni wodumo wasesiteji, Umoja.
Umlando wakhe umsondeze nezihlabani okubalwa kuzona uBusi Mhlongo omgqugquzele ukuyimela into akholelwa kuyona nayiyona, uSfiso Ncwane, uJudith Sephuma neLadysmith Black Mambazo. Zolo lokhu ubesonga umzungezo wase-United States of America ehambisana neciko kwezokudweba, uSir Zanele Muholi.
Ukukhipha kwakhe lo mculo kulandela imvunge esuke ngefilimu Inxeba egcine ichithwa kwamanye ama- cinema ekhuluma nangakho ukulalana kwabobulili obubodwa. Emasontweni ambalwa futhi adlule kuvele imibiko yokushaywa kwabesilisa ababanjwe belalene ebandleni lamaNazaretha.
Uthi baningi abafisa ukukhuluma ngokwenzeka empilweni yabaphila le mpilo kodwa abangakwazi njengoba yena eqoke ukusebenzisa umculo.
“Ngifisa ukuqwashisa umphakathi ngoba kawukho umculo wezitabane oqondene nazo ngqo, yingakho ne-albhamu ngiyiqambe ngokuthi “Identity” ngoba kubalulekile ukuba nguwe ngokuphelele. Ziningi izinto ekhuluma ngazo i-albhamu ngale kobutabane, kodwa nje igoqa konke okuthinta ezocansi nokuthandana.
"Kunenqwaba yezitabane ezaziwayo ezingabaculi kodwa ezithi uma sezicula zikhulume ngothando lowesilisa nowesifazane. Kukahle nje ukuba nami ngikhulume ngendoda yami. Umculo wami ukhuluma ngezinselelo zabantu abacwaswayo okufaka nabakhubazekile. Buka nje, uma umuntu ethandana nonebala elimhlophe kuba sengathi kukhona okungalungile.
"Kumele sibekezelelane ngesikukhethayo empilweni, sinxusa nani abezindaba ukuba ningabiki ngendlela ebhebhezela ukucwaswa,” kwenaba iNtombi Yesigodi.