Bancoma iNingizimu Afrika ngohwebo
ININGIZIMU Afrika ikhombise intshisekelo yokuhweba nokutshala imali e-Afrika, ngokujoyina i-African ExportImport Bank (Afreximbank) njengomunye wabanikazi bamasheya.
UHulumeni waseNingizimu Afrika umelwe yi-Export Credit Insurance Corporation of South Africa (ECIC), kwi-Afreximbank njengomtshalimali. Lokhu kwenze leli lizwe laba ngelama-47 kwawase-Afrika ukujoyina leli bhange njengomnikazi wamasheya.
Ukujoyina kwaleli lizwe kwiAfreximbank, kujabulise ngisho umengameli wayo, uMnu Benedict Oramah. Utshalomali lweNingizimu Afrika e-Afrika lulinganiselwa phakathi kwama-30%-35%.
“Ukujoyina kweNingizimu Afrika e-Afreximbank kubaluleke kakhulu ukuze phela leli bhange likwazi ukuphumelelisa iphupho lalo lokukhulisa uhwebo lwalo ngamasheya lusuke e-15% luye ema-22% ngonyaka wezi-2021, lenyuse nemali yalo ibe ngaphezu kuka-R2.9 billion ngawo owezi2021. Siyethemba ukuthi ukuba yingxenye yaleli bhange kweNingizimu Afrika kuzosiza ukududula umkhankaso wokusabalalisa ezohwebo i-Afrika yonke,” kusho uMnu Oramah.
Isikhulu esiphezulu se-ECIC, uMnu Kutoane Kutoane, sithe: “Sizizwa sijabule futhi sigqugquzelekile ngesenzo sikahulumeni waseNingizimu Afrika sokwethemba i-ECIC ukuba ibe yingxenye yaleli bhange.
"Sinethemba lokuthi izinkampani zaseNingizimu Afrika ezihwebelana namazwe angaphandle, ikakhulukazi ezincane, zizothola ithuba lokuhwebelana ngemali nezakwamanye amazwe angamalungu aleli bhange,” kusho uMnu Kutoane.
Uthi i-ECIC ihlose ukwakha ubudlelwano obuzohlomulisa bonke abathintekayo kuleli bhange. INingizimu Afrika kayikwazanga ukujoyina i-Afreximbank ngesikhathi isungulwa ngowe-1993, kwazise leli lizwe belisaphethwe wuhulumeni wobandlululo.
Amalungu aleli bhange njengamanje yi-Angola, iBenin, iBotswana, iBurkina Faso, iBurundi, iCameroon, iCape Verde, iChad, iComoros, iCôte d’Ivoire, iDemocratic Republic of Congo, iDjibouti, i-Egypt, i-Ethiopia, iGabon, iGambia, iGhana, iGuinea, iGuinea-Bissau, iKenya, iLesotho, iLiberia, iMadagascar, iMalawi, iMali, iMauritania, iMauritius, iMorocco, iMozambique, iNamibia, iNiger, iNigeria, iRepublic of Congo, iRwanda, iSenegal, iSeychelles, iSierra Leone, iSão Tomé and Príncipe, iSouth Sudan, iSudan, iTanzania, iTogo, iTunisia, i-Uganda, iZambia neZimbabwe. Umthombo yiBusinessDay