Imikhiqizo yeBBS ithunyelwa phesheya
Lkhona nakwaSpar nasePick 'n Pay
USEZAKHELE igama umlimi wesifazane omnyama wasePort Shepstone, ogwini oluseningizimu yeKwaZulu-Natal, onepulazi elingamahektha ayisi-6 elikhiqiza utamatisi, u- green pepper namakinati ohlobo lwe- macademia athunyelwa e-United States of America (USA) nasemazweni ase-Asia nawase-Europe.
UNkk Busisiwe Molefe (49), ongumnikazi weBBS Farm, uthi ukusebenza kanzima nokungayisabi inselelo yikhona okumenze wakwazi ukuncintisana nabalimi iningi labo okungabamhlophe.
Ngaphandle kokudayisa ezimakethe zaphesheya, utamatasi nogreen pepper wakhe uyatholakala ezitolo okubalwa kuzona uPick 'n Pay noSpar eNingizimu Afrika.
Uthi uqale leli bhizinisi nje, into abeyifisa wukudayisela omakhelwane bakhe ukudla okunempilo kodwa okuthe uma sanda isibalo sabantu abebethenga, wabona ukuthi indawo abetshala kuyona isincane.
“Ngitshale imifino ngoba nginothando lokuyidla, nginesifiso sokunikeza abantu ukudla okunempilo. Ngokubona indawo ebengitshala kuyona isincane, ngixhumane noMnyango weZolimo nokuthuthukiswa kwezindawo zasemakhaya wangisiza ngomhlaba othe xaxa.
“Emuva kwalokho kangibange ngisabheka emuva. Ipulazi lami likhulile, lisuke kwi- subsistence producer laba yi- commercial enterprise, okungijabulise kakhulu kwanginika nogqozi lokuqhubekela phambili,” kusho uNkk Molefe.
Utshele leli phephandaba ukuthi esaqala ukutshala imifino uke wabhekana nenkinga njengoba kungafani nokunye ukudla kwazise kudinga indawo engabandi kakhulu futhi engashisi kakhulu.
“Ngisaqala bengike ngitshale kodwa ngingayiboni inzuzo njengoba utamatisi omningi ubushiswa kakhulu yilanga, ugcine ubunile. Into ebiyaye ingisize wukungenela imincintiswano, imali engiyiwinayo kuleyo mincintiswano ngiqhube ngayo ibhizinisi lami,” kusho yena.
Ngowezi-2010 ungenele umncintiswano woMnyango wezoLimo KwaZulu-Natal, iFemale Entrepreneur Awards, walala isibili. U-R50 000 awuwine lapho uthi yiwona aqale ngawo ukutshala amakinati.
Kulo nyaka uphinde wahlabana ngo-R15 000 ngokulala endaweni yesithathu emingenelweni eli-145 kwiMbokodo Iyazenzela Women in Business Awards yeThala, ewuhlelo olukhulu lwalesi sikhungo sezentuthuko KwaZulu-Natal.
Kumanje uNkk Molefe unezisebenzi ezingama-25 eziqashwe ngokugcwele bese kuba nezili-10 aziqasha uma evuna. Ngemuva kokuqeda umatikuletsheni eBhe- kameva High School, eHighflats, eningizimu yeKwaZulu-Natal, ngowe-1988, uNkk Molefe ube yivolontiya e-Advancement Community Development Corporation.
Ngowe-1992 uqokelwe ukumela iNingizimu Afrika eSweden ohlelweni lokushintshana ngabantu bamazwe amane, obeluhlelwe yiAdvancement Community Development Corporation.
Ngesikhathi eseSweden, umangaliswe wumusa womndeni wakwaPhilip othe uzomfundisa uma esebuyele eNingizimu Afrika ngowe-1996. Ngaleso sikhathi ubesevele engenwe wuthando lwezolimo, wabhalisa e-University of KwaZulu-Natal ophikweni oluseMgungundlovu, maphakathi neKwaZulu-Natal eyokwenza iziqu ze-Agricultural Extension and Rural Resources Management.
Izifundo azikhethile zithela izithelo njengoba esanda kuhlonishwa emcimbini weThala Development Finance Corporation, obuklomelisa osomabhizinisi besifazane abavelele.
Ithala likhiphe u-R878 600 000 lixhasa amabhizinisi alinganiselwa ema-700, kwadaleka amathuba emisebenzi angaphezu kwezi-8 000. Kuwona wonke la, angama-28% ngawabantu besifazane kanti awentsha abalelwa ema-405 abolekwe yiThala imali.
E-BBS Farm, uNkk Molefe uyimenenja yomkhiqizo nezokukhangisa kanti ufisa ukukhuthaza abanye abantu besifazane ukuba bafeze amaphupho abo, baphumelele.
“Ngifisa ukubona banda abantu besifazane abaqala amabhizinisi endimeni ebilawulwa ngabantu besilisa,” kusho UNkk Molefe.