Kasikatholakali isixazululo sezinkinga eDUT
Ithi isamile ku-6.5%
KUMISIWE ukufunda nokufundisa eDurban University of Technology (DUT) ngenxa yokuthi izisebenzi zakule nyuvesi kazivumelani nabaqashi ngodaba lwamaholo.
Ngokuthola kweLANGA, le nyuvesi ivalwe emuva kokuba kuzwakele ukuthi nabafundi sebefuna ukungenela isiteleka balekelele izisebenzi. Sekuphele amasonto ayisihlanu kungafundwa ngenxa yokuthi izisebenzi zifuna ukwenyuselwa amaholo ngo-10% hhayi ngo6.5% obekwa ngumqashi.
NgoMsombuluko odlule bekulindeleke ukuba kuqale ukufunda kodwa kakwenzekanga. NgoLwesibili olwedlule izisebenzi zingene emgwaqweni zathi kazilubhadi emsebenzini.
Inyuvesi iwamisile amakilasi kuze kube abafundi bayaziswa uma sekulunge izinkinga. UMengameli woMkhandlu wabaFundi eDUT, uMnu Sphephelo Mthembu, uthi bayinikeza isikhashana le nyuvesi ukuba ilungise lolu daba nezisebenzi ngoba kuzokwenzeka ngenye indlela manje.
"Kasijabulile ngalo mdonsiswano oqhubekayo. Siyaphela manje isigaba sokuqala sonyaka kungafundwanga, okuyinto esingahambisani nayo,” kusho uMnu Mthembu.
Umnyango obhekelele indaba yezisebenzi kule nyuvesi, ukhiphe incwadi ebhekiswe ezisebenzini ethi isinqume ukuthi zimile izingxoxo mayelana nesinqumo esithathiwe sokuba izisebenzi zenyuselwe ngo-6.5% okubalwa nokwenyuselwa umhlomula wezindlu ngawo u-6.5%.
Bekuyalelwe isisebenzi ngasinye ukuba siphendule ukuthi siyakwamukela yini okubekwe yinyuvesi etafuleni. Kukhona amahlebezi athi bese kuyalelwe ne- zinhloko zeminyango yeziqu ezehlukene ukuba zibhalise phansi othisha abafuna ukusebenza kodwa kwanhlanga zimuka nomoya.
Izisebenzi bezifuna u-10% zagcina zehlela ku-8.5% kodwa inyuvesi imile ku-6.5%. Lolu daba selubuya ngisho kwaCommission for Conciliation Mediation and Arbitration (CCMA) kodwa kasitholakalanga isixazululo.
USihlalo woMkhandlu waseDUT, uMnu Wiseman Madinane, uhlangane nezinyunyana ngoLwesibili kodwa kasitholakalanga isixazululo.
UNobhala weNational Education, Health and Allied Workers‚' Union (Nehawu) KwaZulu-Natal, uMnu Phakama Ndunankulu, uthi kusazohlalwa kubhekwe okusetafuleni ukuze kubonakale ukuthi kuzoyiwa kanjani phambili.
Utshele ILANGA ukuthi kabagudluki ezimfunweni zabo, kumele kube khona okuphathekayo ukuthi babuyela ngaliphi emsebenzini. Okhulumela inyuvesi, uMnu Alan Khan, uthi bayaxolisa kubona bonke abathintekayo ngesiteleka sezisebenzi.
Uthi inyuvesi iphezu kwezinhlelo zokuzibophezela ukuthi sizobuyiselwa kanjani isimo kwesejwayelekile.
Uveze nokuthi abafundi baseDUT abasenenkinga yokubhalisa ngenxa yalezi zinkinga, bacelwa ukuba babhalise ngomyalezinyazi ( online) ngokuvakashela kwisizabulembu ( website) esithi: www.dut.ac.za noma baxhumane nale nombolo ethi: 031 373 5005.
Le nyuvesi ibidalule ukuthi kayikwazi ukwenyusela izisebenzi imali ngoba ikweletwa yizitshudeni imali engango-R625 million.
Umkhandlu wenyuvesi ubuthe nyakenye wu-R220 million ongakhokhwanga yizitshudeni yize ikhona imali engango-R489 million esenqolobaneni yesikhungo, izinyunyana ezithi makuthathwe kuyona kodwa okuyinkinga ngoba kumele kwenziwe okuningi okubalwe kukhona nengqalasizinda.
U-68% wesabelomali bathi iya emaholweni, okuyinto engamukelekile.