IYANDA IMIJAHO ENIKELA NGEZIMOTO
BASIKE iphethini yeZululand District Marathon yokuklomelisa izingqwele ngezimoto abagqugquzeli beHarry Gwala Marathon ezokuba ngeSonto lomhla zizine kuNdasa (March) usukela e-Ibisi, eMzimkhulu, iphelele eXopo.
IHarry Gwala ngeyokuzibekisela isikhathi sokubamba iqhaza kwiComrades Marathon ezokuba mhla zili-10 kuNhlangulana (June) isukela eMgungundlovu isongwe eMoses Mabhida, eThekwini. Umjaho iHarry Gwala uzokube une-21km, i-10km ne-5km fun run.
Ikhuluma nabezindaba izolo ngoLwesithathu eMzimkhulu, iMeya yaseHarry Gwala, uMluleki Ndobe, ikuqinisekisile ukuthi izingqwele zalo mjaho zizohlomula ngezimoto kubo bobubili ubulili. Uthi bazohlangana maduzane bazame ukuvala igebe elikhona phakathi komklomelo wezingqwele nabaphume endaweni yesibili njengoba bezothola u-R20 000 kubo bobubili ubulili.
Uqhube wathi bahlele imijaho eminingi ukuqinisekisa ukuthi kabekho abantu abasala ngaphandle. Uthi lo mjaho uyakhula njengoba uhanjelwa nangabasubathi abaphuma ngaphandle kwaseNingizimu Afrika.
“Ngingajabula uma umklomelo wemoto ungasala eHarry Gwala kwazise sinabo abasubathi abaningi abahlonishwayo emhlabeni kubalwa uWillie Mtolo, uBongomusa Mthembu ( osesithombeni) noThobani Chagwe. Umsubathi wokuqala waseHarry Gwala ozoshaya intambo uzothola u-R5 000,” kusho uNdobe.
Usuku lokuvala ukwamukelwa kwemingenelo kwi-42km ne-21km wuLwesihlanu lomhla zimbili kuNdasa kanti le eminye kuzobhaliswa nangosuku lomjaho. Imali yokubhalisa ngu-R180 kwi-42km, kube uR130 kwi-21km, kanti uR80 kwi-10km no-R20 kwi-5km. Abafuna ukubhalisa bangangena kwi- website ethi: www.eventtiming. info/harrygwala noma bashayele kwethi: 039 834 1904.
Abasubathi baseMgungundlo- vu bazogadulisana kwiMaritzburg City Marathon ezokuba ngeSonto kusuka ngo-5 ekuseni eMgungundlovu. Ngolwazi kushayelwa uJohn Hall kwethi: 082 491 7679.
Kuhlelwe iKZN Track & Field eqala kusasa ngoLwesihlanu isongwe ngoMgqibelo eKings Park Athletics Stadium, eThekwini.