KUHLELWA IMIDLALO YESIBHAKELA EMPANGENI
UZOZITIKA ngezimpi umphakathi waseMpangeni namaphethelo ohlelelwe umqhudelwano wesibhakela ozokuba ngeSonto e-Imbizo Conference Hall kule ndawo.
Lo mqhudelwano ohlelwa yiTono Promotions, bekumele ube ngenyanga edlule kodwa wabuye wahlehliswa. Impi ezihola phambili ngeyeMiddleweight phakathi kukaWade Growth waseGauteng noDido Mukanya waseDemocratic Republic of Congo (DRC). Enye impi ebhekwe ngabomvu ngeyeLightweight phakathi kukaBrandon Naude noRaymond Kupula.
UMfundisi Ngema uzongqimuzana noBongani Bhuti empini yeBantamweight kuthi uThemba Zuma alwe noNatalia Banni waseUganda. UMuzi Mvimbi uzobheka- na noJudas Sithole empini yeJunior Featherweight kuthi uSphamandla Ngubane alwe noTrevor Ngonyama empini yeBantamweight.
Kuzokuba nempi yabesifazane lapho uCynthia Mthembu ezokulwa khona noSindisiwe Ncube waseZimbabwe empini yeFeatherweight. Kungenwa ngo-R100 emnyango kanti ukuhlala endaweni yezicukuthwane kubiza uR300, kodwa izingane ezineminyaka yobudala engaphansi kweli-12 zizongena mahhala.
Lo mqhudelwano wesekwe ngabeKuhlwile Consulting neNdlela yempilo Academy. UNokwanda Mbatha ongumqhathi walo mqhudelwano, uthi seziqonde zonke izinhlelo zawo njengoba eseqede konke neBoxing South Africa (BSA).