KUSINDA KWEHLELA KUMQEQESHI WE-CHIEFS
KUSINDA kwehlela kuSteve “Mphathi” Komphela ( osesithombeni) ongumqeqeshi weKaizer Chiefs yize ezakhe kubukeka zizihambela kahle izinto.
IChiefs izokwamukela iBloemfontein Celtic kowe-Absa Premiership ngoMgqibelo ngo20h15 eFNB Stadium, eSoweto.
IChiefs kubhekwe ukuba izidlele amahlanga kwiCeltic njengoba le kilabhu kaMax Tshabalala ingenzi kahle kulezi zinsuku. Ibhekene nezikaKaizer “Shintsha Guluva” Motaung ezivutha zingabaselwe kulezi zinsuku.
Kazikahlulwa selokhu kuqale unyaka.
IChiefs zilokhu ziyihambela kahle izinto njengoba izokuya kulo mdlalo kubuye abadlali bayo abebelimele.
UMulomowandau “Tower” Mathoho, uGeorge Maluleka noGustavo Paez abebelimele kulindeleke bashaye ibuya kulo mdlalo njengoba sebejima ngokugcwele nabalingani babo. UMaluleka noPaez beqiwe wumdlalo weLamontville Golden Arrows noweCape Town City, uMathoho yena waphuthwa ngoweCity.
UKomphela uthi kusinda kwehlela njengoba kubuya laba badlali.
“Ukubuya kwabo kungethwesa umthwalo onzima kodwa futhi omnandi ngakolunye uhlangothi. Selokhu ngafika kwiChiefs cishe kuyaqala ukuthi bonke abadlali bami babe sefomini. Njengoba kubuya laba badlali nje, kangazi ukuthi ngizosibophela kanjani isikimu.
“Kunzima ngoba wonke umuntu uzinikele, ufuna ukulwela ikila- bhu. Nokho kufanele sihlanganise amakhanda nethimba lami siphume nesikimu esizokwenza sinqobe umdlalo weCeltic. Awuzukuba lula kodwa ifomu esikuyona inginika ithemba lokuthi sizoyigudluza endleleni yethu,” kusho uKomphela.
UNdumiso Mabena ongumgadli weCeltic, uthi bazimisele ngokulephula irekhodi leChiefs.
“Siyakuqonda ukuthi basefomini futhi kababhenywa ekhaya kodwa-ke siyazi lapho bebuthaka khona.
Silwenzile ucwaningi ngabo noma kanjani sizolephula leli rekhodi labo lokungehlulwa kulo nyaka, siyela lona,” kusho uMabena.