Izinswelaboya seziphendule izwe lethu kwaMachanca
UKUHLASELA kwezinswelaboya zibulale amaphoyisa ayisihlanu nesosha eselathatha umhlalaphansi eNgcobo, e-Eastern Cape, yisigameko esishaqisayo esiyinkomba yokungahlonishwa komthetho eNingizimu Afrika.
Ukuhlasela amaphoyisa esizindeni sawo sokusebenza kufana nokuhlasela umbuso uqobo lwawo.
Kwamanye amazwe, izigilamkhuba ezenza lobu bubi zigwetshwa isigwebo sentambo. Abenzi bobubi benziwe isibonelo ukuxwayisa ezinye izigebengu.
Imibiko iveza ukuthi kuleli dolobhana laseNgcobo vele kukwaMachanca, kwampuz’ edl’ emini.
Izigebengu zizenzela umathanda ngoba ziyesatshwa ngumphakathi nabomthetho imbala.
Esimeni esinje, lapho ngisho amaphoyisa esaba ukwenza umsebenzi wawo ngenxa yokwesaba ukusocongwa yizelelesi, izakhamizi zisemseni wezinswelaboya.
Izakhamizi kazinaso isiqiniseko sokuthi uma zibika amacala kwabomthetho, izephulamthetho zizoboshwa, zijeze njengokufanele ububi ezibenzile. Lesi simo kasemukeleki neze.
Okudabukisayo wukuthi amaphoyisa asesaba izigebengu noma asebenzisana nazo ukwenza ukugcweleza abantu.
Umbuzo ovelayo uthi uma kunje, ngabe abantu abangenacala bayophephelaphi na?
Kakusizi ngalutho ukuba sizishayele ihlombe ngokuba nomthethosisekelo oqhakanjiswa umhlaba wonke ngokuthi ugcizelela ukubaluleka kokuhlonishwa kwamalungelo abantu, uma izakhamizi zihleli ngokwesaba ziphilisa okwezinyamazane ezweni lazo.
Imithetho ebonakala sengathi igcizelela ukuhlonishwa kwamalungelo ezigebengu, kodwa ishaye indiva imibono nenhlalakahle yezakhamizi eziqotho nezihlonipha umthetho, kayemukelekile.
Isimo esinjalo singadala ukuba abantu bangabe besawuhlonipha umthetho, bazibambele mathupha ukulungisa isimo sobugebengu ezweni.
Ukugwema lokhu, sinxusa uhulumeni ukuba uqinise ingalo yomthetho kulabo abephula umthetho.
Umengameli wezwe, uMnu Cyril Ramaphosa, kuthiwa uhlongoza ukwenza izinguquko kwikhabhinethi yakhe, maduze.
Simnxusa ukuba enze isiqiniseko sokuthi ubeka ungqongqoshe kulesi sikhundla sokuphatha amaphoyisa ozimisele ngokufingqa imikhono, alwe nobugebengu ezweni.
Inkinga ngalo ngqongqoshe ophethe njengamanje, uMnu Fikile Mbalula, wukuthi ungunontandakubukwa okwesakabuli, uthanda ukuvela emithonjeni yabezindaba, abonakale nasezinkundleni zokuxhumana enza amahlaya angathi shu kodwa kakubonakali ukuthi wenzani.
Ngeke izwe lethu liphumelele uma ubugebengu budlange ngale ndlela, yingakho kufanele ukuba ukulwa nobugebengu kube seqhulwini ezinhlelweni zikahulumeni kaMnu Ramaphosa.
Amaphoyisa asesaba izigebengu...