UKHALA NGOMMELI "OBEMQOLA" EYE-RAF
OPHUKE unyawo engozini yemoto usola ummeli ngokufuna ukumqola isizumbulu samarandi emalini yesinxephezelo yakwaRoad Accident Fund (RAF).
UMnu Nkanyiso Mbatha ( osesithombeni) waKwaNongoma ukhala uyazithulisa ngommeli wakhe athi uzama ukumqola ingxenye kaR800 000 anxeshezelwa ngawo yiRAF.
UMnu Mbatha uthi namanje akasikholwa isenzo salo mmeli, ILANGA elinalo igama lakhe, amsola ngokuzama ukukhwabanisa uR300 000 ku-R800 000 okhishwa ngabakwaRAF.
UMnu Mbatha uthi ufake isicelo salesi sinxephezelo emuva kokushayiswa yimoto ngowezi-2015 esemsebenzini lapho ebengunogada khona. Ugcine eshiya emsebenzini emuva kwale ngozi njengoba esefakwe nensimbi onyaweni.
Uthi okwenze wagcina eseqoka ukuthola ummeli wukuthi abakwaRAF nabo ubesesola ukuthi kukhona ubugebengu ababenzayo njengoba bese bemtshela ukuthi ngeke esakhokhelwa imali ngoba useluleme.
“Emuva kokulimala ngifake isicelo kwaRAF kwazise bengingasasebenzi. Kuhambe isikhathi abakwaRAF eThekwini bangitshela ukuthi basitholile isicelo sami, bangiyalela ukuba ngilinde. Bengilokhu ngixhumana nabo kwathi ngowezi-2016 bangithinta, bengazisa ukuthi ngizoyithola imali yami.
“Bafikile ekhaya bangisayinisa wonke amaphepha, bacela nemininingwane yami yasebhange. Kudlule izinyanga kuthulekile ngase ngiphindela khona ngiyobheka ukuthi kubambeni. Bangitshele ukuthi ngeke ngisakhokhelwa imali ngoba sengeluleme ekubeni nginensimbi engiphila nayo.
“Ngibone kungcono ukuba ngithole ummeli ozongisiza kulokhu,” kusho yena. Uthi ekupheleni kukaMasingana ( January) nonyaka wathola umlayezo kwabakwaRAF bethi makaxhumane nommeli wakhe ngokushesha.
“Ngimthintile ummeli wathi angize ehhovisi lakhe eThekwini. Ngifike kuyena wangitshela ukuthi isicelo sami sesivunyiwe futhi ngizokhokhelwa u-R500 000 bese yena ethatha eyakhe eyi-R125 000. Uthe uzonginika isaphulelo sezi-R25 000 bese ethatha u-R100 000 nje kuphela.
“Ungidonse ngendlebe ukuba ngingalokothi ngiye kwaRAF ngiyobuza ngalokhu ngoba ngizophazamisa zonke izinhlelo. Lokhu-ke kungisolisile ngabe sengiya kwaRAF ngenhloso yokuthola iqiniso. Ngifike khona bakuqinisekisa ukuthi isicelo sami samukeliwe futhi imali engizokhokhelwa yona wu-R800 000.
“Lokhu kungethusile ngoba kuphambene nokushiwo ngummeli wami. Ngiyasola ukuthi inhloso yakhe bekuwukuba enye ingxenye yale mali ayithathe,” kusho uMnu Mbatha.
UNkz Nomkhosi Gumede, ophethe ezokuxhumana nezokumaketha kwaRAF KwaZulu-Natal, uthe ingamampunge eyokuthi umuntu akayitholi imali uma eseluleme.
“Uma isicelo sakho siphumelele futhi kunobufakazi bokuthi ulimale ngempela, uyithola iphelele imali yakho. Kumele ashintshe imininingwane yasebhange, imali izongena kuye bese emkhokhela yena ummeli,” kusho uNkz Gumede.