UZIBONA EFE EPHILA ONOMAZISI "OYIWELE"
USEZIBONA efe ehamba owesilisa waseMayville, onenkinga yokuba nomazisi “oyiwele” nensizwa yaseGoli.
UMnu Thandukwazi Dube (33) utshele ILANGA ukuthi usegqigqe kwaze kwaguga izicathulo emahhovisi akwandabazabantu aseMngeni, eThekwini, kodwa engalutholi usizo, emuva kokutholakala kokuthi umazisi wakhe “uyiwele” nosetshenziswa ngowesilisa waseGoli.
Ukhala nangokungayitholi incazelo eqondile kwandabazabantu ngokumele akwenze ukuxazulula le nkinga esimise yonke into yakhe.
Uthi uthole ukuthi kunomuntu osebenzisa umazisi ofana nowakhe ngesikhathi eyovula i-akhawunti ebhange nyakenye.
“Ngesikhathi ngithola lo mbiko, ngiqonde kwandabazabantu eMngeni ngiyoqinisekisa lokhu. Obengisiza ukuqinisekisile ukuthi kunowesilisa waseGoli onomazisi onemininingwane efana ncamashi neyami.
“Kuthiwe ukuze ngisizakale, kuzomele kushintshwe inombolo eyodwa kumazisi wami. Ngivumile.
“Manje kangisazi ukuthi yini ebambe ukuthi kubuye omusha kwazise ngitshelwe ngoNdasa ( March) ukuthi umazisi uzobuya emuva kwezinyanga ezintathu.
“Ngikhuluma nje kangikwazi ukwenza lutho ngenxa yobudedengu obenzekile njengoba kungekho okungilungelayo. Ngiyehla ngiyenyuka emahhovisi akwandabazabantu kodwa usizo kangilutholi,” kuzikhalela uMnu Dube.
Uthi kayikho into ayiphilelayo ngoba akehlukile kumuntu ongasekho emhlabeni.
IMenenja yoMnyango wezaseKhaya KwaZuluNatal, uMnu Cyril Mncwabe, ithe bazophenya ukuthi yini ebambe ukuba umazisi kaMnu Dube ungabuyi.
“Imbangela yokuthi umazisi wakhe ungabuyi kungaba wukuthi abomnyango basathungatha umlisa oseGoli ukuze inkinga izolungiseka ngendlela efanele,” kusho uMnu Mncwabe.