IZINGUQUKO ZEMIKLOMELO KOWE-ZDM
IZULULAND District Municipality (ZDM) ihlongoza ukunciphisa igebe elikhona kwimiklomelo yezingqwele nabaphume isibili kwiZDM Ultra (56) Marathon ezokuba mhla ziyi-11 kwephezulu isukela KwaGqikazi KwaNongoma isongwe esikhumulweni sezindiza Olundi.
Izingqwele zithola izimoto kubona bobubili ubulili bese kuthi abangene isibili bahlomule ngo-R20 000. Abasubathi abaningi bakhombise ukunganeliseki ngenxa yegebe elikhona kwimiklomelo.
UThulasizwe Buthelezi oyiMeya yaseZululand utshele abezindaba ngoMsombuluko ukuthi bazohlanganisa amakhanda babone ukuthi lizovalwa kanjani igebe elikhona phakathi kwezingqwele nabaphume isibili. Umjaho wanonyaka ugubha iminyaka eli-13 wasungulwa.
Kulo mjaho kulindeleke abasubathi abaningi ikakhulukazi labo abazimisele ukuba yingxenye yeComrades Marathon ezokuba mhla zili-10 kuNhlangulana (June) isukela eMgungundlovu isongwe eMoses Mabhida, eThekwini. Umgijimi wokuqala waseZululand ogijimela ikilabhu yaseZululand uzothola u-R10 000.
Lo mjaho uzokube uhambisana ne-10km ezojikeleza oLundi lapho izingqwele zawo zizohlomula ngoR4 000. Ukuwubhalisela sekuvuliwe kuze kube wusuku lwawo. Abanesifiso sokuwungenela bangangena kwi-website ethi: www. zululand.org.za noma bashayele enombolweni ethi: 035 874 5500. Ukubhalisa kuzovalwa ngosuku lo mjaho.
Abasubathi baKwaZulu-Natal bazokhiphana inkani kwiHarry Gwala Marathon engeSonto ekhipha imiklomelo efanayo neyeZDM. IHarry Gwala izokube ihambisana ne-42km ezosukela e-Ibisi, i-21km eqala edolobheni eMzimkhulu, i-10km eqala phakathi kweMzimkhulu neXopo.
Kuzovalwa ngoLwesihlanu ukubhalisela i-42km ne-21km bese kuthi i-10km ne-5km kuvalwe ngosuku lo mjaho. Ngolwazi kushayelwa uThemba Gumede kwethi: 072 948 8779 noma 039 834 1904.
IKwaZulu-Natal Athletics (KZNA) izokube nemidlalo yezikole zamabanga aphansi ezoqala kusasa ngoLwesihlanu isongwe ngoMgqibelo eKings Park Athletics Stadium, eThekwini.