UVUNA BANI LO MDLALO WE-CHIEFS NE-BUCS?
UMDLALO womkhaya oba phakathi kweKaizer Chiefs ne-Orlando Pirates kuvamise ukuthi uma uzogijinywa kume yonke into kubhekwe wona.
Nakule mpelasonto kulindeleke kwenzeke okufanayo njengoba la makilabhu ezotholana kowe-Absa Premiership ngoMgqibelo ngo15h30 eFNB Stadium, eSoweto.
Phambilini lo mdlalo bese uya ngokwehlelwa yisithunzi kwazise la makilabhu abengenzi kahle kwiligi.
Cishe sekuphele amasizini angaphezulu kwamathathu agcina ukubhekana esembangweni wesicoco seligi.
Lo mdlalo ngendlela omqoka ngayo kula makilabhu cishe ungase wenze umokalalo kwelizohlulwa.
Phela lo mdlalo kuthiwa uma kukhona elihluliwe kunzima ukukwamukela kubadlali bawo njengoba bethwala kanzima emidlalweni elandelayo.
Njengamanje sibheka ukuthi yikuphi lapho la makilabhu abuthaka khona nalapho eqine khona.
I-PIRATES emdlalweni wayo owedlule iguqise ngo-4-2 iChippa United eNelson Mandela Bay Stadium, eBhayi.
Okugqamile ngePirates wukuthi njengoba uJustin Shonga noBernard Morrison bekhombisa ukuba sefomini kuyenza ibe yingozi phambi kwamapali.
Okungayenza iwunqobe lo mdlalo wukuthi ayinanazi phambi kwamapali njengoba emi- dlalweni yayo emihlanu eyedlule ihlohle amagoli ayisi-9.
Nokho kodwa okungayihlulisa njengoba ibhekene neChiefs wukuthi iyavuza emuva.
Emidlalweni yayo emihlanu eyedlule isidedele amagoli ayisi-7.
Kuyona yomihlanu uwodwa nje vo engangenelwanga kuwo yigoli yingesikhathi yehlula ngo-2-0 iPlatinum Stars ekuhambeni.
ICHIEFS emdlalweni wayo owedlule ibambane ngo-0-0 neBloemfontein Celtic eFNB Stadium, eSoweto. Nakuba iChiefs ingakaze yehlulwe nonyaka kodwa irekhodi layo aligculisi ngaleyo ndlela njengoba imidlalo yayo eminingi iyidlala ngokulingana.
Umidlalweni yayo emihlanu eyedlule inqobe emibili yadlala ngokulingana kwemithathu.
Lokhu kwenza ibukeke njengamagwala uma iya emidlalweni.
Isizathu salokhu sibonakala ngokuthi ayihlohli amagoli amaningi uma inqoba kanti futhi ayivuzisi emuva.
Emidlalweni yayo emihlanu eyedlule isangenelwe ngamagoli amabili yahlohla amane.
Ubugwala bayo yibona obungase buyinqobise lo mdlalo kwazise uma ingalishaya kuqala igoli kuzoba nzima ukuthi iPirates ilithole ngendlela emaka ngayo emuva.
Kanti okungayihlulisa kulo mdlalo wukuthithiza kwezitobha zayo njengoba iPirates ingalibheki ipali kulezi zinsuku.
Imiphumela yemidlalo emihlanu yala makilabhu ebhekene imi kanje:
21/10/17: Kaizer Chiefs 0-0 Orlando Pirates. 04/03/17: Kaizer Chiefs 1-1 Orlando Pirates. 29/10/16: Orlando Pirates 0-0 Kaizer Chiefs. 05/03/16: Orlando Pirates 2-0 Kaizer Chiefs. 30/01/16: Orlando Pirates 1-1 Kaizer Chiefs.