Luya kude olukapholoni namaviyena
Kushayeka umnotho kanti nemisebenzi isengcupheni
NGASEKUQALENI konyaka, leli phephandaba libikile engosini yalo yezempilo ngokubheduka kwesifo i- listeriosis okuyilona daba olusematheni njengamanje.
Ngaleso sikhathi ibisiqalile imibuzo ebhekiswe kuNgqongqoshe wezeMpilo, uDkt Aaron Motsoaledi, wokuthi isifo simenyezelwa nini njengobhubhane emphakathini.
Impendulo ngaleso sikhathi ithe umnyango wezempilo usiqaphele lesi sifo ukuthi senzenjani njengoba phakathi kokunye kuyaye kubhekwe izibalo ngokusabalala kwaso.
Sekuyaziwa-ke manje ukuthi imiphumela yalolo cwaningo isiyenze uNgqongqoshe Motsoaledi wahlaba umkhosi wokuba yonke imikhiqizo yenyama ephansi kwesikhondlakhondla senkampani yokudla, iTiger Brand, ingabe isasetshenziswa ngoba kusolwa ukuthi yiyona ethwele igciwane laso, iListeria monocytogene.
Inkampani iRainbow Chicken, nayo iyathinteka. Imboni ekhonjwe ngenjumbane yale mikhiqizo, kubikwa ukuthi isePolokwane, eLimpopo. Okunzima-ke kubathengi wukuthi nxa lowo mkhiqizo ususezitolo ungawubona kanjani oqhamuka ePolokwane. Lokhu kufakazelwa wukuthi izigigaba zokufa kwabantu abangesibo abaseLimpopo ziyabikwa nakwezinye izifundazwe.
OSEKWENZEKILE OKWAMANJE
Imiphumela yokubheduka kwe- listeriosis isiqalile ukubonakala kusuka uDkt Motsoaledi ekhiphe umyalelo wokuba abantu bangabe besawudla upholoni, ama- russian namaviyena.
Kule ngwadla sekushayeke ngasikhathi sinye zonke izigaba zomkhiqizo: abenzi bemikhiqizo, yizitolo eziyithengisayo, namakhasimende adla le mikhiqizo. Ngokwesimemezelo, okwenzekile wukuhoxiswa emashalofini ezitolo kwayo yonke le mikhiqizo ebaliwe, ukuze ilahlwe.
Okunye okungaziwa noma kuze kwenzeka ngempumelelo wukubuyisela abathengi imali abathenge ngayo lokhu kudla. Bese kuba wukuhlanzwa kwendawo okusetshenzelwa kuyo ngenkathi kwenziwa le mikhiqizo.
Lokhu kunzima ukuthola ukuthi kuhamba ibanga elingakanani kwazise lezi zindawo vele kulindeleke ukuba zihlanzeke futhi abathengi bathembele kubenzi bemikhiqizo edliwayo ukuba bagcine imiyalo yezempilo eyenza inhlanzeko ibe wumbandela wokuqhuba lolu hlobo lomsebenzi.
Njengoba kungakaze kube nemibiko lapho abahloli bezempilo bakwahulumeni bezwakalisa khona ukungeneliswa ngeqophelo lenhlanzeko kulezi zindawo, ikakhulukazi khona ePolokwane, kushiya umbuzo othi ingabe bekwenzeka ngendlela efanele yini lokho kuhlolwa kwezindawo okusetshenzelwa kuzo.
Nokho khona lapho kungase kube nempendulo ethi phela le bacteria ikwazi ukwenza ‘ingubo’ yokuzivikela ebizwa nge- biofilm okuyiyona eyivikelayo ngisho isezintweni ezingenampilo - amapayipi, amapulangwe nokunye. Okusho ukuthi inhlanzeko kungenzeka kungabi yiyona eholele ekubhedukeni kwalesi sifo.
ISIMO KUBATHENGI
Inkinga yokuqala abathengi ababhekene nayo ikhona lapha ekutheni nakuba ukhonjwa ePolokwane umsuka walesi sifo, kepha umthengi ohlangana nomkhiqizo ususemashalofini akanayo indlela yokwahlukanisa ukuthi yimuphi ovela lapho nongaveli khona.
Kuzwakala kuletha ithemba okushiwo yisikhulu esengamele enkampanini iTiger Brands, uMnu Lawrence McDougall nxa ethi ukuphepha kwempilo yamakhasi- mende kusemqoka kubona. Futhi uqhubekile wathi benza konke okusemandleni ukufinyelela emsukeni wale nkinga.
Okuzwakale bebalisa ngakho abakhiqizi wukuthi nakuba kulula kubona ukuhoxisa imikhiqizo yabo ezitolo, kodwa abazi ukuthi bangenzenjani ukwenza amakhasimende ayilahle le mikhiqizo aseyithengile.
Njengenjwayelo, abezindaba bayaye baye emphakathini ukuzwa ukuthi abathengi bayibona kanjani le nkinga esivelile. Uma ulalele imisakazo, abantu bephawula ngokwehlukana, uvele ubone nje ukuthi baqinisile abathi kuyahlekwa ngisho kufiwe.
Babodwa abathi bona upholoni bazowudla ngoba bawuthengile, ugcwele amafriji kumanje. Abanye babalisa ngokuthi le mikhiqizo yenza bakwazi ukonga futhi ingumasheshisa uma wenza umphako wokuya emsebenzini noma owabafundi. Labo abaphawule kanjena abenziwa wukungafundi ngoba abanye basezikhungweni zemfundo ephakeme.
IMIPHUMELA EMNOTHWENI
Okokuqala nokusobala nosekushaye kwezwakala ezinkampanini ezingabakhiqizi balokhu kudla okubaliwe, wukulahlekelwa yinzuzo ngomkhiqizo nakanjani osekumele ulahlwe. Okwesibili wukwehla kwamanani amasheya alezi zinkampani ezimakethe zezimali ( stock exchange).
Okwesithathu wukuthi ukwethembeka nesithunzi sazo kubathengi sizobuyiswa kanjani. Okunye okwesatshwayo wukumangalelwa kwezinkampani kufunwe isinxephezelo yileyo mindeni ethintekile. Lezi zinkinga zihamba ibanga elide uma kubhekwa nokuthi amazwe angaphandle angomakhelwane baleli, abethenga le mikhiqizo, asethe ayahoxa ekuyithengeni.
Okwesine akukaziwa ukuthi yini ezokwenzeka ngamathuba emisebenzi yabaqashwe yilezi zinkampani. Akekho owaziyo ukuthi isiphetho sizokuba yini.