UDINWE UYAVEVA "OSHIYA" I-CHIEFS
Ucikwa yisenzo sikaSteve Komphela
UNOZINTI weKaizer Chiefs okuvela ukuthi uyahamba kule kilabhu uma kusongwa isizini udinwe uyaqhuma yisenzo somqeqeshi wale kilabhu uSteve “Mphathi” Komphela.
IChiefs izogadulisana namaZulu FC kowe-Absa Premiership ngoMgqibelo ngo-18h00 eFNB Stadium, eSoweto.
U-Itumeleng Khune kulindeleke aqhubeke nokuthatha indawo yakhe ezintini, uBrilliant Khuzwayo adle amaqhwa ebhentshini njengoba sekuyimpilo yakhe.
Leli phephandaba lihoshe ngemithombo yalo engaphakathi kwiChiefs ukuthi uKhuzwayo udinwe uyaqhuma yisenzo sikaKomphela sokungamuqalisi emdlalweni weChiefs neStellenbosch weNedbank Cup obungeledlule eMoses Mabhida Stadium, eThekwini.
Umthombo uthi njengoba bekungumdlalo obubukeka ulula njengoba bekudlalwa nekilabhu egijima esigabeni esiphansi, uKhuzwayo ubelindele ukuthi uKhune uzophunyuzwa kuvinjiswe yena.
“UKhune noKhuzwayo abashiyani kangako ngokuvimba cishe into uKhune amuhlula ngayo uKhuzwayo wukusabalalisa ibhola kokunye bacishe balingane.
"Simcasulile isenzo sikaKomphela sokuthi ngisho emdlalweni olula kanjena angamubopheli esikimini.
"Ubone kuwukungamethembi ukuthi emdlalweni olula kanjena aqhubeke nokuvimbisa uKhune.
"Uselinde kuphele isizini nje bese enquma ngekusasa lakhe ngoba akhona amakilabhu amfunayo wukuthi ufuna ukuhamba kahle kungaxatshenwe.
"Uboke uqaphele uma uKhune eke wathinteka emdlalweni akasazixaki ngokuyozifudumeza uvele ahlale nje ebhentshini akasayingeni leyo,” kusho lo mthombo.
Leli phephandaba lizamile ukushayela uVina Maphosa wezokuxhumana kwiChiefs. Lithe nje lisayiqala le ndaba leli phephandaba wathi umatasa akabuye ashayelwe wavala ucingo.
Emuva kwalokho ucingo lwakhe bese lukhala lungabanjwa.
Imizamo yokukhuluma noKomphela noKhuzwayo ibingeke isaphumelela kwazise uma kukhona umuntu ofuna ukukhuluma naye kwiChiefs imvume uyithola kuyena uMaphosa lo obengasalubambi ucingo.