Ubehlela ukuvula isilaha "obulale" izingane
Ubehlale eya edolobheni, ephathela umndeni izinto ezimnandi
UBESEZINHLELWENI zokuvula amabhizinisi aphinde alobole intombi yakhe ngezizumbulu zemali yomshwalense ephume ngokufa kwabashana bakhe abane, uMnu Ben Mbhele oboshwe ngeledlule ngecala lokubulala lezi zingane.
UMnu Mbhele (32) waKwaNzimakwe, ePort Edward, ukhalelwe ngamasongo kaSigonyela ngoLwesihlanu ngecala lokugwaza abulale abashana bakhe abane. Umndeni wakhe utshele ILANGA ukuthi ubephezu kwezinhlelo zokuvula amabhizinisi ngemali ayitholile.
ILANGA lithole lolu daba ngodadewabo omdala, uNkz Phakamile Mbhele, obehlala nomsolwa. Uthe ubesanda kuxoxela indodana yakhe endala ukuthi uhlela ukuvula indawo edayisa utshwala nesilaha. Uthi indodana yakhe uyixoxele lokhu nje, ibisadidekile ukuthi uninalume uzoyithatha kuphi imali eningi kwazise beyimazi ukuthi uyazizamela. Ubesebenza engunogada.
Kuthiwa ubesetshele nenye yezintombi zakhe ukuthi usefuna ukuthumela abakhongi, bezocela isihlobo esihle. Kuthiwa utshele intombi ukuthi mayimbuzele kubazali bayo ukuthi bangafuna imali engakanani uma esethumela abakhongi ngoba usezimisele ngokuyenza inkosikazi.
UMnu Mbhele zimkhalele ngemuva kophenyo olunzulu lwamaphoyisa ngokubulawa kwabashana bakhe abane, uBandile (12), uLwandile (10), uSphindile (7), uLwandle (4). Babulawa ngoMandulo (September) nyakenye. Lezi zi-ngane kuthiwa zangenelwa ngabesilisa abangaziwa zilele zodwa unina wazo, uNkz Silindile Mbhele, engekho.
Kuthiwa umsolwa ubehlale ebalisa njalo zingakashoni izingane zikadadewabo, ekhala ngokungabi nayo imali. Kuthiwa ubethi imishwalense iyithatha yonke imali yakhe yomholo, angasali nalutho ukuzijabulisa, agcine eseswele ngisho imali yokugibela uma eya emsebenzini.
Nokho kuthiwa kwadlula inyanga eyodwa kushone abashana bakhe, wathengela umndeni wakhe amafriji amabili, isitofu esikhulu esipheka ngogesi, nenqwaba yokudla. Umswenko obizayo kuthiwa ubusubuzwa kuyena, eseshintshe indlela agqoka ngayo yize ebesaqhubeka nokuba ngunogada. Kuthiwa ubehlale etshela umshana wakhe ukuthi uzokuba yisicebi uma esevule indawo edayisa utshwala nesilaha.
UNkz Mbhele uthi yize ubezama ukubafihlela ukuthi unemali, kodwa kwesinye isikhathi bekuzenzekela kona ahluleke ukufihla, babone ngaye esebathengela izinto ezimnandi.
“Njalo uma engasebenzi, ubevuka ekuseni ageze, aye edolobheni. Ubengabuyi engaphethe lutho olumnandi ephathele izingane zami. Ubesethenge nomakhalekhukhwini omusha, obizayo. Okunye engikuqaphelile ngaye obese kushintshile, wukuthi ubesenenqwaba yezintombi azithole ezinkundleni zokuxhumana. Lokho ngikubone nasocingweni lwakhe anginikeze lona ngesikhathi eshaqwa ngamaphoyisa,” kusho uNkz Mbhele.
UNkz Mbhele ukuqinisekisile ukuthi umfowabo ubebomvu yimali yemishwalense njengoba eveze ukuthi izingane zikadadewabo ubezikhave ezindaweni ezahlukene. Uthi bathole ukuthi uwodwa umshwalense ongamkhokhelanga.
UMnu Mbhele uvelile eNkantolo eNkulu yaseMgungundlovu ngoLwesibili lapho efike walivuma khona icala lakhe. Kulindeleke ukuba aphinde avele kule nkantolo ngomhla wama-22 kwephezulu. Bheka nasekhasini 3