KUSOLWA UKUDUNWA KWEMOTO KUBULAWA USOMATEKISI
KUSOLWA ukudunwa kwemoto ngokudutshulwa kubulawe umshayeli wetekisi obengaphansi kwePinetown Taxi Association, odutshulwe ehamba nozakwabo abayisi-7 eMariannhill izolo ngoLwesithathu ekuseni.
Ngokuthola kweLANGA ngoMnu Jabulani Mazibuko, onguSihlalo weKwaZulu-Natal Taxi Alliance, kulesi sigameko kushone uMnu Mlungisi Khawunjilo (34), obehamba ngetekisi eyisikwele.
Ubehamba nabashayeli asebenza nabo beyolanda izimoto njengoba bezipaka egalaji elisePinetown uma beshayisa.
Bonke laba bashayeli basebenzela uMnu Mndebe Shange ongaphansi kwalo soseshini. UMnu Khawunjilo nguye obeshayela itekisi abebehamba ngalo kanti kuthiwa kuthe uma sebebheke erobhothini kwaqhamuka imoto yohlobo lwePolo, yangabuza lutho, yavulela ngemhlamvu kubona.
“Sisola ukuthi bebefuna ukuduna imoto ngoba izigebengu ziyazi ukuthi isikwele siyabekezela emgwaqweni futhi sishintsheka kalula. Kusiphatha kabi ukubulalana okwenzeka kule mboni yethu.
“Ngibona kusazoqhubeka ukufa kwabantu ngoba iphethwe ngabantu abangakholelwa ekuxazululeni izinkinga ngokukhuluma. Uma umuntu enenkinga nawe noma efuna ukungena kuleli bhizinisi, uvele afune ukugudluza okhona ngokuba ambulale.
“Akukapheli sikhathi esingakanani kade kufa abantu kubangwa imizila eHammarsdale, manje sekwenzeka lokhu. Endaweni yaseMandawe kudutshulwe kwabulawa omunye usomatekisi ngoMsombuluko njengoba sekwenzeka lokhu,” kusho uMnu Mazibuko.
Uthi nakuba uhulumeni ezama ukubalekelela ngezifundo zamabhizinisi, kodwa abantu abaningi abasembonini kabakafundiseki kahle njengoba besabulalana nje.
“Sifisa ukuba uhulumeni angenelele, kufundiswe abantu ngokuphathwa kwe- bhizinisi. Iningi labantu abakule mboni kabasiqedanga ngisho isikole. Umuntu uyaye afike ezowasha izimoto, abe ngusicabha, abe ngumshayeli agcine esenemoto engene emzileni engazi lutho ngokuthi ibhizinisi liphathwa kanjani.
“Uma kukhona inkinga yokungaboni ngaso linye umuntu abone ukubulala umuntu njengesixazululo,” kusho uMnu Mazibuko.
Umalume kamufi, uMnu Enock Ndlovu, wenqabile ukuphefumula ngalolu daba. Ucele ukuba banikwe isikhathi njengomndeni bakwazi ukubhekana nalesi simo esibehlele.
Okhulumela amaphoyisa KwaZuluNatal, uColonel Thembeka Mbhele, usiqinisekisile lesi sigameko.
Uthe akekho osaboshiwe, kusenziwa uphenyo.
Uthi abanye abalimele baphuthunyiswe esibhedlela ukuyokwelashwa.
ILANGA lihlulekile ukubathola njengoba izingcingo zabo bezingabanjwa.