UZISOLE PHAMBI KWEZIHLOBO NGOKUFA KWABASHANA
USESABA ukuhlala kubo uNkz Phakamile Mbhele, ongudadewabo omdala kaMnu Ben Mbhele obhekene necala lokubulala abashana bakhe abane ngoba egaqele imali yomshwalense.
UNkz Mbhele uthi namanje akuvumi ukuba akholwe ukuthi ngumfowabo owabulala izingane zikadadewabo ngesihluku esinje.
Uthe ngeSonto umfowabo uthumele umyalezo esesitokisini, wokuthi ucela ukubonana nomndeni okuyilapho okuthe uma befika kuyena waxolisa ngento ayenzile, wakhala ngokuthi ubeluthwe ngusathane. Uthi ucele uxolo wabe esebaxoxela lonke udaba lokufa kwezingane zikadadewabo ebambisene nomngani wakhe.
UNkz Mbhele uthi ubehlala nomfowabo nezingane zakhe ezimbili, kungekho lutho alusolayo ngaye njengoba engumuntu olungile futhi ohloniphayo.
“Ebengikubona nje ngomfowethu wukuthi ubesehlile emzimbeni kodwa ngingazitsheli ukuthi kukhona okumudlayo ngaphakathi. Ubesejwayele ukuthi azivalele yedwa ekamelweni lakhe uma engasebenzi. Ubesebuyele nasesontweni, sivamise ukuhamba naye uma engasebenzi, ngize ngijabule ngimncome ukuthi uthathe isinqumo esihle ukubuyela esontweni.
“Kwesinye isikhathi besike sithandaze ndawonye, sikhulekela ukuba kubanjwe umbulali wezingane zikadadewethu. Bengize ngibize igama likaLwandile uma sengithandaza, ngiyincenga ingane ukuba isivezele umuntu owababulala khona ezojeza ngesenzo sakhe. Naye bengimuzwa esesho kanjalo uma sithandaza naye amemeze igama likaLwandile emncenga ukuba asivezele umuntu owababulala, kanti kangazi ukuthi uzisho yena,” kusho uNkz Mbhele ezwakalisa ukudumala ngento eyenziwe ngumfowabo.
UNkz Mbhele uthe ukhathazekile ngempilo kadadewabo aveze ukuthi selokhu kwashona izingane zakhe impilo yakhe isishintshe kakhulu kunakuqala.
Kuthiwa nokuphuza izimbiza zikaFaro sekwenyukele kakhulu kunakuqala. Uthe selokhu kwenzeka lesi sigameko udadewabo akakaze alulekwe ngokomqondo.