KUGWETSHWE IKHANSELA NGOKWEBA IZINKOMO
LIZOKUBA nePhasika elimnyama ikhansela le-African National Congress (ANC) ebelisebenza kuMasipala waseMthonjaneni eligixabezwe yiNkantolo yesiFunda ePiet Retief, eMpumalanga, ngeminyaka eyisi-7 lithothoza etilongweni.
Izolo ngoLwesithathu uMthokozisi Mthembu, obeyikhansela kuwadi 7 kulo masipala, ugwetshelwe icala lokubanjwa nezinkomo ezebiwe ezili-11 ezibiza isamba sika-R60 000.
Kuthiwa lezi zinkomo bezebiwe eMooihoek Farm, khona eMpumalanga. ILANGA like labika ngalolu daba phambilini.
Kuvele ukuthi uMthembu webe lezi zinkomo mhla zili-16 kuZibandlela (December) wezi-2016 kuleli pulazi weza nazo KwaZulu-Natal.
UMthembu ugwetshwa nje, le nkantolo ibimlahle ngecala lokweba imfuyo ngoLwezi (November) nyakenye.
UMnu Joshua Mazibuko okhulumela Inkatha Freedom Party (IFP), uthe uyawuhalalisela umthetho ngokusebenza ngokuzikhandla, ungachemi ukuthi umuntu uqhamuka kuliphi iqembu lezombusazwe.
Nokho uzwakalise enkulu indumalo ngokuthi umuntu osebenzela umphakathi angaboshelwa icala lalolu hlobo.
“Kulahlekisa ngethemba uma isenzo esifana nalesi senziwa ngumholi womphakathi. Kufanele uhole ngobuqotho nxa usesikhundleni,” kusho uMnu Mazibuko.
UMnu Msawakhe Mayisela, okhulumela uMnyango wezokuBusa ngokuBambisana nezoMdabu KwaZuluNatal, uthe: “Nakuba umbiko besingakawutholi, kodwa lesi sigameko, siyawuphoxa umnyango,” kusho uMnu Mayisela othi wake wafunda ngaleli cala phambilini.
Okhulumela uMasipala waseMthonjaneni, uMnu Thami Shangase, uthe bayaqala ukuzwa ngodaba lukaMthembu. “Besingazi ukuthi uMthokozisi ulahlwe yicala lokweba imfuyo.
"Siwumasipala siyazwelana naye ngokumehlele.
"Ubuholi bomkhandlu buzohlangana buxoxe kabanzi ngodaba lwakhe,” kusho uMnu Shangase.