AHOXISIWE AWESHENDE "ELEBA INGANE"
AHOXISIWE wonke amacala abhekene noyise wengane enenyanga eyodwa unina owabika ukuthi ithunjiwe eseGame City, eThekwini, kanti uhubhuza amanga ingane ithathwe nguyise wangempela.
Isigameko sikaNkk Sibongile Mbambo (35) waseNdwedwe, sokulahlekelwa yingane yakhe, uSiwaphiwe, sanyakazisa izwe lonke ezinkundleni zokuxhumana. Abaningi babemduduza, bethi bazombeka emthandazweni ukuba ingane isheshe itholakale.
Kwajika ukudla epuletini ngemuva kwezinsuku ezimbili ngesikhathi kusabalala izindaba zokuthi amaphoyisa asebophe unina wengane nowesilisa oyishende lakhe, okukholakala ukuthi nguyena uyise wengane wangempela.
Inkantolo yeMantshi yaseThekwini izolo ithole uMnu Phumlani Mbokazi, onguyise wengane wangempela, emsulwa emacaleni abebhekene nawo enkohlakalo nokudelela ingalo yomthetho.
Ummeli kaMnu Mbokazi, u-Adv Andile Daleka, uthi konke obekwenziwe nguMnu Mbokazi kwakuwukusiza ingane yakhe ukuze ihlangane nomndeni wayo wangempela.
UMnu Mbokazi nobeyisinqandamathe sakhe, uNkk Mbambo, uthe baze bakha leli tulo ngoba unina wengane engazi ukuthi uzoyikhipha kanjani kumyeni wakhe ashade naye, uMnu Funokwakhe Mbambo (53).
UMnu Mbambo unamakhosikazi amathathu.
Wakha itulo neshende lakhe kwaba sengathi udunwe imoto ngoba isoka lifuna ingane yalo.
Inkinga ayebhekene nayo ngeyokuthi ingane uyithole esemshadweni, nomyeni azi ukuthi ngeyakhe.
Zijikile izinto ngesikhathi amaphoyisa esekhiphe umehlokaboni ka-R250 000 kuloyo obezowatholisela ngomkhondo wengane.
Kuthiwa lezi zithandani zawuconsela amathe lo mehlokaboni zabe sezakha itulo lokuba ziyibuyise ingane kanti zizokuba nebhadi, zibanjwe.
UNkk Mbambo ugwetshwe iminyaka eyisihlanu esejele ngaleli cala, uyise wengane wakhishwa phambili yinkantolo ngoba ithi konke ayekwenza weyecabangela ingane yakhe.