UZUMA ULINDE ISINQUMO
LOWO obengumengameli wakuleli, uMnu Jacob Zuma ( osesithombeni), uzokwazi “noma yinini kusukela kusasa” ukuthi uzoshushiswa yini noma qha maqondana namacala okukhwabanisa nenkohlakalo.
Okhulumela uPhiko lwezokuShushiswa koMphakathi, uMnu Luvuyo Mfaku, akathandanga ukulusho usuku uMqondisi kaZwelonke woPhiko lokuShushiswa koMphakathi, uShaun Abrahams, azokwazisa ngalo umphakathi ngesinqumo sakhe.
Uthe labo abathintekile kumele kwaziswe bona kuqala.
“UMqondisi woPhiko lokushushiswa koMphakathi (uMnu Abrahams) uhlele ukwazisa labo abathintekile ekushushisweni kukaMnu Zuma ngesinqumo sakhe noma nini kusukela kusasa futhi uzobe esewazisa umphakathi waseNingizimu Afrika ukuthi uzosimemezela nini isinqumo sakhe sokuthi uMnu Zuma kumele abekwe yini icala noma qha,” kusho yena.
Lokhu kulandela isiqinisekiso seCouncil for the Advancement of South African Constitution (Casac), ukuthi yehlulekile emizameni yayo yokuba iNkantolo yoMthethosisekelo ivimbele uMnu Abrahams ukwenza isi- nqumo sokuthi uMnu Zuma uzobekwa yini amacala noma qha.
Isinqumo sisho ukuthi uMnu Abrahams akusekho okumvimbelayo emthethweni ukuba angasenzi isimemezelo.
*Khonamanjalo, iDA ifuna isinqumo senkantolo esithi ukuchithwa kwesamba esingu-R15.3 million uMnu Jacob Zuma ngezindleko zamacala akhe kwakungekho emthethweni.
Iqembu lifuna futhi ukuba izinkantolo ziphoqe iHhovisi likaMengameli ukuba lifune leyo mali kuMnu Zuma.
NgoLwesibili iDA iveze incwadi ephuma kummeli wombuso eshoyo ukuthi uhulumeni wa-khokha isamba esingu-R15.300 250 million ngezindleko zamacala kusukela ngowezi-2009.
I-DA ithi le mali kumele uhulumeni uyibuyise ngoba uMnu Zuma wayezivikela odabeni lombiko oqoshiwe wezobunhloli yena siqu esebenzisa imali yabakhokhi bentela ngamacala ayenzeke ngaphambi kowezi-2009.
Umholi weDA, uMnu Mmusi Maimane, uthe iqembu selithumele incwadi ehhovisi likamengameli ngalolu daba.