UZIBULELE OKHUBAZEKILE "OBEYISIGQILA SOCANSI"
KUSOLAKALA ukuthi uzibulalele ukuba yisigqila socansi owesifazane okhubazekile okuthiwa bese kuphele isikhathi eside ezama ukubika udaba lwakhe, kodwa umndeni ulugxoba ngezinyawo.
UNkz Nomfundo Dlomo (24), waseDalton, kuthiwa uphuze amaphilisi ngoMsombuluko kwathi ngoLwesibili washona. Kunezinsolo zokuthi ubehlukunyezwa ngelinye ilungu lomndeni okubikwa ukuthi bese kunesikhathi eside lizitika ngaye. Ngokuthola kwaleli phephandaba, kuthiwa uNkz Dlomo uqale ukudlwengulwa eneminyaka emibili. Kuthiwa ubehamba ngesihlalo esinamasondo impilo yakhe yonke.
Kuthiwa ubekhala nsuku zonke, ecela ukuxhunyaniswa namaphephandaba ukuze abike usizi lwakhe, kodwa umndeni ungafuni nokuyizwa leyo ndaba. Umthombo weLANGA uthi kunezinsolo zokuthi umndeni ubuvikela umenzi wobubi kanti uNkz Dlomo kubikwa ukuthi ubehlala koninalume nesalukazi esizala unina, umalumekazi nabazala bakhe, kwazise kabasekho abazali bakhe.
“Le ndaba ixoxwe isikhathi eside kodwa isixazululo sayo kasikaze sisizwe njengoba ingane isizibulele,” kusho umthombo. UMnu Mduduzi Majijane, weDisability Talent Search Motivational and Farming, uthi lolu daba baqale ukuluzwa ngoNcwaba (August) nyakenye.
Uthe baze baya kuwona lo mndeni beyozwa kabanzi ngoba kuyabahlukumeza nabo ukungaphathwa kahle kwabakhubazekile. Utshele ILANGA ukuthi ngesikhathi behambele lo mndeni, uNkz Dlomo ube-ngakwazi ukukhuluma ngokukhululeka ngoba bebemngena emlo-nyeni abomndeni, kwezinye izinto uma ethi uyazidalula.
Uthe ngoMgqibelo uthole ucingo oluvela kuNkz Dlomo ethi ucela le nhlangano isheshise ngokuphothula izinhlelo zokuba athathwe ezihlobeni zakhe ngoba uyahlukumezeka.
“Ingane yasitshela ukuthi uma isele yodwa liyafika leli lungu lomndeni liyenzakalise ngokocansi. Yathi sekuneminyaka yenzeka le nto. Ngikhuluma nje, ibingasakwazi nokubamba umchamo, usuziphumela nje ngenxa yakho ukudlwengulwa. Bese siziqalile izinhlelo zokuxhumana nezinhlaka ezifanele zikahulumeni ukuze kusizwe ingane,” kusho uMnu Majijane.
Utshele leli phephandaba ukuthi nabo ibaphathe kabi indlela lo mndeni obusingethe ngayo lolu daba. Uthi emhlanganweni ababe nawo nomndeni, ubuze ilungu ukuthi kungani bembambatha indaba enkulu kangaka.
“Ngimbuze ukuthi kungani engabi nazo izinseka ngoba kumele engabe kudala lwabikwa udaba, wathi lolu daba lwaxoxwa emndenini kwavunyelwana ngokuthi maluphelele kuwona bazolulungisa ngokomndeni,” kusho uMnu Majijane.
Okhulumela amaphoyisa KwaZulu-Natal, uColonel Thembeka Mbhele, usiqinisekisile isigameko. Uthi amaphoyisa aphenya imbangela yokuzibulala kwakhe uNkz Dlomo.
“Sithole ukuthi ubesezame kwaze kwaba kathathu ukuzibulala. Kulokhu kwakamuva, udle amaphilisi anhlobonhlobo ngokweqile wathatha nakagogo wakhe,” kusho uColonel Mbhele.
Imizamo yokuxhumana nalo mndeni ayiphumelelanga kwazise bezingangeni. Izinombolo zawo ukuze kuzwakale uhlangothi lwawo kulolu daba.