Umuntu makashade nephupho lakhe
KUNGCONO ukuthi ungabi nalutho empilweni, ungabi nakudla kunokuba udle ujeqeze, wesaba ukuthi ungabanjwa. Kubuhlungu ukuzitika ngokudla uqalaza, ngivamise ukuthi ubumnandi bokudla noma bento abukho kuyona, kodwa busekutheni uyithole kanjani.
Akusizi ukuhalela izinto zabantu esingazi nokuthi bazithola kanjani. Ukuba bekuya ngami, bengiyothi umuntu akafunde ukuphatha kahle nokwaneliswa yinto ayiphiwe nguNkulunkulu ngaleso sikhathi. Kubuhlungu ukuthanda nokuhalela into okungesiyona eyakho.
Bengifisa wonke umuntu ezweni lakithi azibuze ukuthi le nto enginayo ngabe ngeyami yini. Kubuhlungu ukujatshuliswa yinto kanti unembeza uyakushaya. Uboke uzibuze ukuthi le ndoda enginayo eyami yini, lo muntu wesifazane enginaye owami yini, lesi sihlalo engihleli kusona asinaye yini umnikazi waso, njengoba ngilele emashidini ngavela ngentshebe nje, lo mbhede engilele kuwona angiqalazi yini.
Ngiyaphinda futhi ngiyawubuza lo mbuzo othi: “Uma uNkulunkulu engake akufonele athi ngoMsombuluko ozayo ngehora lesibili ntambama umphefumulo wakho ngiyawuthatha - yini okungathi uma ubeka ucingo phansi uthi uyoyilungisa?
Kungaba yisithandwa sakho, yisemsebenzini wakho, noma kukwenu? Yini ongathi Nkosi ungakangithathi ngicela ukuqala ngiyolungisa lokhu nalokhu. Ngiyacela ukuba lezi zinto obungazilungisa uma ethi uNkulunkulu uzokuthatha, uqale manje uzilungise zonke ngoba alukho ucingo oluzongena mhla usuzohamba, bonke abahamba abafonelwanga, nawe mhla uzohamba emhlabeni awuyikufonelwa.
Kuzo zonke izinqumo esifisa ukuzithatha empilweni ezibucayi, esesabayo ukuzithatha, ungabe usabuza inyama negazi, njalo uma ufuna ukuthatha isinqumo ubokwenza umhlangano nabantu abathathu, makube nguwe, unembeza wakho, bese kuba noNkulunkulu. Uma nobathathu nivumelana ngesinqumo kungabe kusadlula nosuku olulodwa, sithathe.
Kubuhlungu ukubekezela entweni kanti ubekezelele ize futhi njalo uma uzothatha isinqumo, ungabobuza kakhulu abantu ngoba mhla sekubheda kumele ungalokhu usola abantu, kufanele uzisole wena. Singakubalekeli ukuthi kubuhlungu ukuthatha isinqumo emuva kweminyaka eminingi, obekumele ngabe usithathe izolo ngoba wesaba abantu ukuthi bazothini. Umbuzo uthi bake bathini abantu?
Yonke into esiyenzayo emhlabeni masizenzele thina, silalele unembeza wethu, sibheke noNkulunkulu, singabanaki abantu ngoba bahlale bezikhulumela. Bayokuncoma ubheda, bakugxeke wenza kahle. Asiphile emhlabeni, uma silala singaphuphi kabi. Uma sinokudla efrijini sikudle sikuqede.
Kubuhlungu ukugcwalisa ifriji kanti ngeke udle, kubuhlungu ukugcwalisa izingubo kuwadilophu kanti ngeke uzigqoke. Ngiqonde ukuthi kubuhhlungu ukuba abantu bakuncome kanti uyakhala ngaphakathi uthi: “Ukuba bayazi”.
Konke esikwenzayo phansi komthunzi welanga, singakhohlwa wukuthi umuntu uphila kanye. Uma ungafa ngeke usabuya. UNkulunkulu usinike isikhathi esincane emhlabeni.
Ngicela lesi sikhathi onaso ungasimoshi ulokhu udansela iculo ongalizwa, uhleka into engahlekisi, udlala abantu. Ungafi ungakaze ube nokuthula futhi ungakaze uphile.
Ngiyafisa ukuba empilweni sonke sibe nesikhathi sokuthi sike sivale amehlo, sicabange kahle ukuthi yini esifuna ukuyenza. NgesiNgisi kuthiwa: “Where there is no vision people perish.”
Umbono yile nto oyibona uvale amehlo, uthi uma uwavula ungayiboni, kodwa wazi ukuthi kunento owayibona mhla uwedwa. Izingcithabuchopho zithi ungakholelwa kakhulu entweni oyibonayo, kholelwa entweni owake wayibona. Uma kwenzeka into oyibona manje ingafani nento owake wayibona, ubokwazi ukuthi le nto oyibona manje eyesikhashana.
Ngiyafisa ukuba wonke umuntu ashade nephupho lakhe, abe wumngani nephupho lakhe, akholelwe ekulona, angalindi abantu baze baliqonde ngoba akekho umuntu oyoqonda iphupho lakho. Abantu iphupho balibona mhla selaphumelela, umuntu wokuqala okumele akholelwe ephusheni lakhe, nguwena.
Ngicela ukuvala ngokuthi isihlakaniphi siyayibeka imali kuthi ushintshi osalayo siwudle, isiwula siyayidla imali kuthi ushintshi siwubeke. Yonke into oyitholayo iqambe igama lokuthi yimbewu.