Engikubona kuxegisa isimilo ezinganeni zanamuhla
IZIKHATHI ziyashintsha. Kuningi obekwenzeka esikhathini esiphambili okuthinta ikakhulukazi ukunakwa nokukhuliswa kwezingane. Bekulula nje ukuthi ingane ithi inabo abazali bayo kodwa ingahlali nabo, mhlawumbe ithathwe iyokhulela ezihlotsheni ngenxa yokusondezela isikole.
Bekuba kuhle nje ngoba nezigigaba noma izigameko zokuthi ayihleli kahle lapho ikhona, bezingavamisile ukubikwa. Bekuvamise ukuba ifike ihlangane nezinye izingane zalapho ikhulela khona, ikhule kahle ngezimiso zakulowo muzi ekuwona.
Ezinye izingane zikhule zihlala ezikoleni ngaphakathi bengekho nhlobo abazali bazo, zikhuliswa ngothisha nalabo abazigadile, zibuyela emakhaya ngamaholide kuphela.
Nakhona lapho kaziziningi izigameko ebezibikwa ngemithelela yalolu hlobo lokukhuliswa kwezingane, ezinye ngisho namanje zisakhulela khona ezikoleni ngaphansi kweso nemithetho yesikole zize ziqede omatikuletsheni ziphila kanjalo futhi nekusasa lazo kalibi nazinkinga ngoba zifunda ukuzimela zisencane.
Lokhu kuyakhombisa ukuthi omunye umuntu angayikhulisa ingane okungeyona eyakhe ngendlela okuyiyo aze ayifundise ngisho nemigomo ezoyakha igcine iwumuntu oqotho nozimele empilweni yayo.
Lokhu kufakazela isisho sesiZulu esithi ‘ingane yami eyakho, neyakho eyami’. Ngibona sengathi lo mkhuba omuhle wokuthatha ingane yomunye uyikhulise njengeyakho, usuya ngokushabalala.
Sekuyivelakancane ukusiswa kwezingane ezihlotsheni, cishe lokhu kwenziwa nawukuthi nezikole azisantuleki njengakuqala. Ngalesi sizathu izingane eziningi zikhulela emakhaya azo, zihlala nabazali bazo noma labo abazigadile okungaba ogogo, omalume namanye amalungu omndeni.
Kuyadida ukuthi kwenziwa yini izinga lokudlebeleka kwezingane kubonakale kudlondlobala kangaka ekubeni zibe zikhuliswa emindenini esibuka kuyileyo okumele zikhulele kuyona.
Okudida kakhulu wukuthi iningi labazali abakhulisa lezi zingane, ngabathathwa njengabakhanyiselekile, abafundile, yize amazinga okufunda kwabo engalingani, kodwa abafani nabangaphambilini ababengazange basibone isikole noma ababelunguze kancane kusona. Kanti empeleni inkinga ikuphi? Kuyacaca ukuthi imfundo iyodwa ayiziniki izingane izimfundiso eziqotho. Kukhona okungaphezu kwayo okungafundisa izingane zethu.
Esinye sezizathu esidala ukuxega kwezimfundiso ezidluliselwa ezinganeni, wukuba matasatasa kwabazali, bagcine bengasenaso isikhathi abasichitha nazo, bezinika izimfundiso nemigomo yempilo ezozakha.
Abanye abazali bahamba kusempondo zankomo beya emsebenzini babuye sekuhlwile bekhathele, bangasitholi isikhathi sokuxhumana nezingane zabo. Uthola ukuthi izingane zikhulisana zodwa, lezi ezindadlana yizona ezibheke ezincane zizisiza nangemisebenzi yesikole ngoba abazali begijinyiswa imisebenzi.
Abanye abazali ababonani nhlobo nezingane phakathi nesonto kuze kube yimpelasonto nayo futhi ematasatasa ngoba kunemicimbi abaya kuyona njengemingcwabo nemishado, bezishiya ngemuva futhi izingane.
Lobu butatata buyazilimaza izingane ngoba azisitholi isikhathi nokufudunyezwa umzali. Nomzali akasitholi isikhathi sokubona ukuthi konke kusahamba kahle yini ngengane yakhe. Uma lolu hlobo lwezingane luhlangana nabangani, kuba lula ukusheshe luthatheke, lugcine seluphila impilo yabangani.Uthola umzali oqotho esenengane ebheke eceleni ngenxa yokuthi isikhathi sezimfundiso sincane.
Phela ingane ifundiswa ngokuthi into uyiphindaphinde ize ingene kuyona, iyijwayele.
Lokhu kuba lula uma kunesisekelo sobudlelwano obuphilayo nobunakekelwayo, buze bube yinjwayezi nakuyona ingane.
Ngibona sengathi kuyadingeka kube nomunye umuntu noma abantu abalekelelayo ekhaya uma abazali besebenza, abazokuba yiso lomzali.
Esimeni lapho kungenzeki ukuthi kube nomunye womndeni, kungaba ngcono umzali acele umakhelwane amethembayo ukuba amlekelele ukubheka izingane futhi kube ngumuntu oqotho ozodlala indima ecishe ifuze eyomzali.
Lokhu kuzosiza ukuba izingane zingabe sezizenzela nje ngoba zazi ukuthi abazali abekho, bayoze babuye sekuhlwile futhi akekho ozozitshela ngoba nakomakhelwane bazibhekele okwabo, abanendaba nokwenzeka kuzona.
Ukubambisana ngokukhulisa izingane zethu kuyosisiza singabazali ukuba silekelelane kulezi zingqinamba izingane zethu ezibhekene nazo.