BASAZIKHALELA ABASHONELWE NGUMCULI PHESHEYA
UNGENE ezikweletini ezinzima umndeni ukulanda isidumbu selungu lawo ngo-R150 000 eCzech Republic, elishone emasontweni ambalwa adlule ngendlela engaqondakali.
UMnu Sikolethu Jiyane, onguyise kaMandlakayise Xolo Jiyane (25), oshonele phesheya eCzech Republic, utshele leli phephandaba ukuthi ugcine eseboleke imali kumalungu omndeni, ukubuyisa isidumbu sendodana yakhe kuleli.
Bese kuphele iminyaka emithathu le nsizwa yaseNseleni yagcina ukubuya kuleli. Kuhlelwa ukuba uXolo afihlwe ngoMgqibelo yize umndeni ukhala ngokuthi kawusalanga namali uqongelela eyokubuyisa isidumbu. UMnu Jiyane uthe: “Kuphoqeleke ukuba siboleke kumalungu omndeni nasezihlotsheni imali ukuze sikwazi ukubuyisa isidumbu sendodana.
Ngilekelelwe kakhulu ngumfowethu ongiboleke isamba esikhulu semali. Nathi sikhiphe konke esinakho emaphaketheni. Ngiyazicelela kulabo abangakwazi ukulula isandla ukuba basilekelele ngoba usemkhulu umsebenzi osimele.”
Umufi kuzokhumbuleka ukuthi uke waba yilungu lekhwaya iZululand Gospel Choir, kanti kuthiwa ubezifela kakhulu ngo-mculo. Emasontweni amabili adlule, leli phephandaba libikile ngobunzima lo mndeni obubhekene nabo njengoba bekumele uthathe isinqumo sokubuyisa isidumbu kuleli ngoR150 000.
Ubunqunyelwe ugwayi katiki phakathi kokuvuma ukuba indodana yawo ilothiswe bese uthunyelelwa umlotha ngo-R20 000 noma ukhiphe le mali.
Lo mndeni ukhethe ukuba uthunyelelwe isidumbu, ubukhala ngokuthi bese kuphele iminyaka emithathu ungakaze umbone umufi.
Siboleke imali kumalungu omndeni nasezihlotsheni, kumanje asinalutho.