SESISOLA UBUQOLA NGOMASINGCWABISANE WAMAROMA
MHLELI: Kwelakho elihluba udlubu ekhasini, ngithanda ukuzwakalisa ukungenami kwami ngebandla lamaRoma aKhatholika endaweni yakithi eSayidi.
Leli bandla lisijoyinise umasingcwabisane obizwa ngokuthi iMasixhasane. Satshelwa ukuthi sizokhokha imali ewu-R10 ngenyanga bese sihlomula ngoR500 uma obhaliswe kulo masingcwabisane edlula emhlabeni.
Inkinga engibhekene nayo wukuthi isihlobo sami ebesiyingxenye yalo masingcwabisane sidlule emhlabeni ngoMandulo (September) nyakenye, kodwa asikaze sithole ngisho indibilishi, ekubeni bekukhokhwa kahle.
Sesizame kaningi ukucela izimpendulo kodwa akekho ozimisele ukusichazela ngokungaphumi kwale mali. Sisanda kutshelwa ukuthi ibandla kalikwazi ukuba nomasingcwabisane walo.
Kuthiwa nalo lijoyine omu- nye umasingcwabisane, okuthi amalungu ebandla angafaka imali bese idluliselwa kuwona.
Sibe sesibuza ukuthi akuphi wona amahhovisi alo masingcwabisane webandla. Sinikwe izinombolo zika-Ayanda Williams owumQondisi wakwaMasixhasane yena othembise ukuthi imali sizoyithola ngokushesha.
Kumanje akasatholakali ocingweni, ekubeni nemali ayikakafiki kithina. Manje besicela noma ngubani ongaseluleka ngokomthetho ukuze silandele imigudu efanele yokufuna ubulungiswa ngoba ngathi sekukhona nezenzo zenkohlakalo kulolu daba.
Inkinga akukho hhovisi esilaziyo esingaya kulona lapha eSayidi ukucela izeluleko zomthetho. Sesiphenduke ihlaya ezinganeni zethu sibadala ngenxa yokudlala abantu. Sikhathazeke kakhulu ngalolu daba.