Luyinzukazikeyi olwenkululeko yezenkolo
EZINSUKWINI ezimbalwa ezedlule sibike ngokwesekwa kweKhomishini Yamalungelo EzamaSiko, Ezenkolo NeziLimi yinhlangano i-FOR SA maqondana nephuzu lokuba aphenywe amabandla okubikwa ngawo izenzo eziphambene nokulunga, ngokwesitatimende sayo esithumelele abezindaba.
Lokhu kulandela isigigaba sase-Eastern Cape, eNgcobo, lapho amalungu ebandla elizibiza ngeMancoba Seven Angels Ministry egasele esiteshini samaphoyisa sakhona adubula abulala amaphoyisa ayisi-5 nesosha elilodwa eselathatha umhlalaphansi.
Sekubuye kwavela nokuthi enkanjini yaleli bandla mbumbulu bekuthunjwe phakathi kwabanye amantombazane angaphezulu kwe-100. Abesetshenziswa njengezigqila zocansi.
Lokho kweseka kwayo ikhomishini bekuphansi kombandela othi lokhu ingakwenza ngegunya lemithetho ekhona vele futhi esingekho isidingo sokuba kushaywe omunye ozokwenza uhulumeni alawule ezenkolo njengoba vele iSigaba 15 salowo mthetho sikwenqabela lokho.
Futhi iFOR SA iqine idolo ephuzwini emi kulo njengoba ikomidi lasephalamende loMnyango wokuBusa Ngokubambisana Nezindaba Zendabuko, nalo lifinyelele kulesi sinqumo maqondana nezincomo zombiko wayo ikhomishini.
Nakuba iFOR SA ivuma ukuthi le mithetho ekhona ayikwazi ukujezisa (enforcement) kodwa ithi uMnyango weNtuthuko yoMphakathi wesifundazwe i-Eastern Cape, wayiqwashisa ikhomishini ngowezi-2016 ngaleli bandla mbumbulu emuva kokutakula abantwana abali-18 kulona ababengafundi.
Kuso lesi sitatimende, iFOR SA ithi ikhomishini, emuva kokuba usihlalo wayo uDkt Thoko Xaluva esebonene nabaholi baleli bandla mbumbulu, wabafaka imibuzo, ukube yalisebenzisa ithuba lokubikela amaphoyisa, iSars, nezinye izigaba zokugcinwa komthetho, isigigaba saseNgcobo sasingase sigwemeke.
Ekhala ngakho ikhomishini ngesimo esikhona njengamanje wukuthi akutho lutho emthethweni olungavimbela abaholi beMancoba Seven Angels Ministry, noma-ke yimuphi omunye umuntu, ukuba basungule elinye futhi ibandla mbumbulu. Yingakho-ke phakathi kokunye izincomo zayo zithi uhulumeni mawuyinike igunya elisemthethweni lokukhipha amalayisense okuqhuba umsebenzi wobufundisi.
Ngakolunye uhlangothi, iFOR SA yona ikholwa wukuthi imbangela esobala yakho konke lokhu osekwenzekile akusikhona ukungabi namandla kwemithetho ekhona kodwa wukungazimiseli kwalabo abaqondene nokuba bayisebenzise.
ILANGA like lixhumane nabanye abefundisi ukuzwa eyabo imibono ngalolu daba, uMphostoli Nathi Zondi ohola iTruevine Community Church eThekwini naseMgungundlovu, uthe nakuba izinhloso zekhomishini zingaba zinhle kodwa inkinga isendleleni efinyelele ngayo kulesi siphakamiso.
Uqhube wathi okokuqala kube nokunyanyalata okwenzekile ngesikhathi ikhomishini icoshela imibono yabantu ngezigigaba ezibikwayo emabandleni. Lokhu kungenxa yokuba kungabanga nokubonisana ngokwanele phakathi kwekhomishini nabaholi bezenkolo.
Wenza isibonelo ngokuthi bekungaba kuhle ukuba ikhomishini yake yazithinta izinhlangano ezengamele izindaba zenkolo esikhundleni sokubonana nabaholi bezenkolo ngamunye.
Naye uhambe kuwo umbono weFOR SA othi le mithetho ekhona yanele ukuba kubhekwane nezigilamkhuba ezisungula amabandla mbumbulu aganga ngabantu. Waleseka leli phuzu ngokuthi yingakho nje nasephalamende ikomidi lingakwazanga ukuseseka isiphakamiso sayo.
Ngeshwa kuze kwashaya isikhathi sokuloba zingakabuyi izimpendulo emahhovisi eDiakonia eThekwini naweSouth African Council of Churches eGoli.