AYENZA INDABA AMA-BLESSER, SESISHELWA HHEBUYA!
AYENZA indaba ama- blesser. Phela manje sesishelwa ngabantwana abalingana nezingane zethu kwi- social media. Uma ngiyibeka ngenye indlela, ngingathi nje imali yethu isishelwa ngabantwana abalingana nezingane zethu.
Phela uma usunezingane nazo esezinabantwana, ngeke ukholelwe ngempela ekutheni intokazi eneminyaka engamashumi amabili nje vo ubudala ibona ibhungu lapha kuwe.
Ingani usuke sewusho ngomkhaba ongangokhamba lokuvubela amahewu, nesishwapha ongathi yinja ikotela umgqomo kadoti, nezigaxa zezihlathi ongathi usicashangebhodwe.
Intokazi isuke izibonela imali nesiduphunga esinengqondo engangeyempukane, kanti bayasho osiyazi ukuthi inyuku nesilima kwehlukana ngokuphazima kwehlo.
Ayazi futhi lawa mantombazane ukuthi ngeke uwahluphe nangocansi ngoba sekwehluleka nochatho, selumane luhleke insini ubhojo, lithi kalikwazi ukwenza izimangaliso zase- Bhayibhelini lungeyena uMose yena owakwazi ukwehlukanisa ulwandle ngeyakhe induku.
Njengoba sekwaba khona nentanethe, oTwitter noFacebook nje, izicelo zothando zingena zingenile, ikakhulukazi uma ubonakala sengathi wenza itoho elinemali noma ungusomabhizinisi.
Ngiphebeza ngiphebezile, ezinye izicelo zothando zivela koTaiwan nakoLiberia futhi zifika nezithombe zophumalangasikothe. Mina ngizibuza ukuthi lawa mantombazane asemancane kangaka alufuna kude kangaka uthando, alukho yini lapho ehlala khona.
Mhlawumbe bakholelwa kulesi siga sesiZulu esithi “induku enhle igawulwa ezizweni”.
Emasontweni edlule ngathola incwadi evela kuHelen waseLi- beria kuFacebook, engibiza ngesithandwa senhliziyo yakhe.
Wabhala incwadi ende nje, echaza ukuthi uthole imininingwane yami kuyo intanethe nokuthi ngenzani futhi ngangenzani phambilini. Ngithe uma ngimbuza ukuthi njengoba esefunde kangaka ngami, akayibonanga yini iminyaka yami.
Waphenduka umculi wodumo waseMelika ongasekho kuleli u-Aaliyah, wathi iminyaka yinombolo nje engasho lutho. Ngamchazela-ke ukuthi akazame komunye ngoba ubu- blesser lobu akusiyo into engizimatanisa nayo, futhi ngeke ngaqala manje.
Kanti-ke kukhona abathi ezinye zalezi zicelo zothando zingubuqola nje lobu obuthandwa yizinsizwa zaseNigeria okuthiwa yi-419 scam. Bathi ngingamangali uma ngithola ukuthi lo Helen ndini yisigora nje sensizwa yaseNigeria ethathe isithombe sentombazane thize khona belu kuntanethe.
La maqola kuthiwa aseqole iningi losomabhizinisi namablesser.
Kuthiwa yindlela abathola ngayo imininingwane yakho eyimfihlo bese beyisebenzisa ukuyovula izikweletu namakhadi asebhange, bathenge wena fenisha, wena makhalekhukhwini njalo njalo bayothengisa.
Wena ubuthi ukhuluma nesimomondiya kanti ukhuluma noAchineke waseLagos, ekuyenga ngendaba.
Kuleli sonto eledlule ngishayelwe ucingo yintokazi yomShayina nayo ithi ifuna isoka laseNingizimu Afrika, elizoyiphatha kahle, liyenzele konke ekufisayo.
Ithe le ntokazi ineminyaka engamashumi amabili nantathu kanti iliqhamukisa le eTaipei, eTaiwan kodwa isihlala eCape Town.
Ngihleke kwaze kwaphuma izinyembezi uma ithi inginika inombolo yayo kamakhalekhu- khwini. Ithe: “silo sefen sefen to sefen free free sex to night”. Ngize ngayithola sekukude ukuthi ibithi: 077 273 3629, ngawa gilikidi bhu phansi.
Sengizoyikhipha inombolo yami kamakhal’ ekhikhini kwiGoogle njengoba phela sengizoshayelwa ucingo ngabantu engingabazi.
Imilayezo yeFacebook nekaTwitter ayingihluphi kangakho kodwa ngiyaphika ngithi ungangithashi kumakhalekhikhini ngibe ngingakwazi nakwanyoko. Futhi angisiye umayidiyela wakho mina.
Ubuthi ukhuluma nesimomondiya kanti ukhuluma no-Achineke.