ABASUBATHI ABAPHAMBILI KOWE-TRACK & FIELD
KUZOGUGA iteki kwiSouth African National Track and Field Championships eqala namuhla ngoLwesine isongwe ngoMgqibelo eTuks Athletics Stadium, eTshwane.
Le midlalo ngeyokulungiselela abasubathi imidlalo yama-Commonwealth Game azoqala mhla zizine isongwe zili-15 kuMbasa (April) eGold Coast, e-Australia.
Emidlalweni eqala kusasa ibanga elizokube libhekwe kakhulu yi-100m lapho kuzokube kukhona u-Akani Simbine ophethe irekhodi laseNingizimu Afrika le-100m, u-Anaso Jobodwana ophethe ele200m.
UJobodwana usanda kugila izimanga kwiLiquid Telecom Athletix Grand Prix Series ngeledlule kuyo le nkundla eshiya uJustin Gatlin wase-United States of America (USA), ingqwele ye-100m kwi-IAAF World Championships nyakenye eLondon.
Abanye ababhekiwe kwi-100m nguSimon Magakwe, uHenricho Bruntjies, uLuxolo Adams ukubala nje abambalwa. Elinye ibanga elibhekiwe yi-800m lapho kubhekwe uCaster Semenya ophethe irekhodi lakuleli kuleli banga.
I-Athletics South Africa (ASA) ithe abanye abasubathi abazokube beyingxenye yale midlalo nguLuvo Manyonga ophethe irekhodi lase-Afrika nelakuleli le- Long Jump. UManyonga kulindeleke ukuba athwale kanzima kuRuswahl Samaai. Elinye ibanga elizokube libhekwe kakhulu i-4x100m relay nele-4x400m lapho kulindeleke ukuba ele- relay lifakwe eqenjini lokugcina eliya e-Australia.
Emlenzeni wokuqala weAthletix Grand Prix Series ele4x100m lenze kahle kakhulu libeka u-38:00 lihluleka ngomzuzwana ukwenza irekhodi lakuleli.
Le midlalo izokube ikhonjiswa kwiSABC ebusuku. Umlenze wokugcina weGrand Prix uzokuba ngoLwesine ePaarl, eWestern Cape.
Iqembu elimele iKwaZuluNatal lididiyelwe kanje: Selilonke iqembu labesilisa limi kanje: uNene Zakithi; u-Andiswa Ndlela; uNtokozo Ngesi; uHeinrich Marloth; uVukani Mdunge; uNkosinathi Sibiya; uJoash Beru; uBonginkosi Zwane; uSipho Mbanjwa noMfundo Mzobe.
Kwabesifazane: uNokuthula Ntshangase; u-Anedisiwe Njunguza; uThobile Mkhize; uNwabisa Mjoli; uGena Lofstrand; uCassidy Williamson; uNatalie Le Roux; uHappiness Mkhize; uSamukelisiwe Mthembu; uNondumiso Khoza; u-Amy Naude noSiphesihle Mbhele.
Abasubathi besifundazwe bazogadulisana kwiDeloitte Challenge yebanga lika-42km ezoqala eBallito isongwe eKings Park, eThekwini, 21km ne-10km.