I-Arrows nezinsongo ezinzima kwiBucs
Bazimisele ngokuqeda umgqigqo wayo wesicoco seligi
IZINSONGO ezinzima ezibhekiswe kwiOrlando Pirates ekhombisa ukuba sefomini eyisimanga kulezi zinsuku ikakhulukazi emidlalweni ye-Absa Premiership.
IPirates izotheleka eThekwini ukuzobhekana neLamontville Golden Arrows emdlalweni we-Absa Premiership ngoMgqibelo ngo-20h15 ePrincess Magogo Stadium, KwaMashu.
ITheku kulindeleke libe mnyama suce ngabalandeli beBucs abazobe beqhamuka kuzona zonke izinkalo njengoba le kilabhu eholwa ngu-Irvin Khoza isethubeni lokudla isicoco seligi.
IBucs iya kulo mdlalo nje, isefomini kulezi zinsuku njengoba ilele endaweni yesibili esicongweni se- log.
Nokho ibhekene ne-Arrows nayo ekhombisa ukubuyelwa wukuzethemba njengoba isiqale phansi iqoqa amaphuzu.
UClinton Larsen, ololonga i-Arrows, ekhuluma naleli phephandaba izolo ngoLwesithathu ekuseni uthe iBucs izalelwe yinja endlini.
“Siyakuqonda ukuthi iPirates isefomini futhi isethubeni lokudla isicoco seligi, kodwa ngeke sivume ukuthi isenze isitebhisi sokuthatha iligi.
"Empeleni izalelwe yinja endlini ngoba izophindela emuva ingaphethe lutho.
"Siyibonile idlala, kukhona esiyifihlele khona. Sinabadlali abasebancane kodwa abanesibindi, abazokhombisa kulo mdlalo ukuthi siyakwazi ukuhlula amakilabhu amakhulu.
"Iphupho lethu alikashintshi sifuna ukusonga sikwi- top 8 ngakho-ke kubalulekile ukuthi siguqise izinkunzi ezinjengayo iPirates,” kusho uLarsen.
Uqhube ngokuthi lo mdlalo ufike ngesikhathi esihle kubuya abadlali bakhe abanesipiliyoni.
“Abantu abangeke babe khona ngoLehlohonolo Nonyane noKudakwashe Mahachi abasalimele.
"UNkanyiso Mngwengwe, obelimele, uqalile ukujima. Kungenzeka abuye kulo mdlalo nokho usazohlolwa.
"UJabulani Shongwe obedonsa isigwebo sekhadi elibomvu naye uyabuya.
"Kuyajabulisa ukubuya kwalaba badlali ngoba siyasidinga isipiliyoni emi-dlalweni yalolu hlobo.
"Ngibeke ithemba kubagadli bethu ngoba siyawadinga amagoli kulo mdlalo.
"Nodonga lwethu lwasemuva kuzofanele luqine futhi lungenzi amaphutha ngoba iPi- rates iyinkinga phambili, iyashesha,” kusho uLarsen.
ULuvuyo Memela, odlala esiswini kwiBucs futhi osefomini kulezi zinsuku uthi bazoyinika indawo yayo i-Arrows.
“Siyakwazi okufanele sikwenze kulo mdlalo. Ngeke sixhamazele kodwa sizoshaya umsebenzi bese siyahamba.
"Akuzukuba ngumdlalo olula kodwa sizozama ngawo wonke amandla ukuwunqoba.
"Asisekho isikhathi sokulahla amaphuzu manje, zibheke entanjeni iphuzu nephuzu limqoka,” kusho uMemela.
Imidlalo ye-Absa Premiership isiyonke ngale mpelasonto iqhathwe kanje: NGOLWESIHLANU EHarry Gwala Stadium: Maritzburg United vs Polokwane City 20h00. NGOMGQIBELO ESisa Dukashe Stadium: Chippa United vs Free State Stars 15h30.
EFNB Stadium: Kaizer Chiefs vs AmaZulu FC 18h00.
EPrincess Magogo Stadium: Golden Arrows vs Orlando Pirates 20h15. NGESONTO EDr Molemela Stadium: Bloemfontein Celtic vs Platinum Star 15h30.