INSELELO KAZIKALALA KOWEZOKUPHEPHA NGEZIDUMBU EMLALAZI
KUNXUSWE uMnyango wezokuPhepha koMphakathi KwaZulu-Natal, oholwa nguMnu Mxolisi Kaunda, ukuba uphenye izinsolo ngezidumbu zamalungu omphakathi okubikwa ukuthi phambilini zatholakala emapulazini akhele indawo yaseMlalazi, e-17.
Lesi sicelo senziwe nguNgqongqoshe wezokuThuthukiswa koMnotho KwaZulu-Natal, uMnu Sihle Zikalala, ekhuluma emhlanganweni obewubanjelwe emahhovisi kaMasipala uMlalazi, ngaphambi kokuhambela ipulazi elishiswe ngumphakathi wakule ndawo ngoLwesine. Lesi sigameko senzeke emuva kokubulawa ngesihluku kukaMnu Siphamandla Gift Xulu, (30), odutshulwe ngunogada eyodoba kuleli pulazi.
UMnu Zikalala uphinde wahambela umndeni kaMnu Xulu, afike wawuthembisa ukuthi bazokwenza konke okusemandleni ukuthi bayaluthola lonke ulwazi abaludingayo mayelana nodaba lwendodana yabo. Uqale ngokuhambela ipulazi okubulawelwe kulona uMnu Xulu, ukuyobheka umonakalo owenzeke khona ukuthi ungakanani.
Okunye uNgqongqoshe akuphakamisile kulo mhlangano wukubaluleka kokusebenzisana nokusungulwa kohlaka oluzohlanganisa abanikazi bamapulazi, umphakathi, umasipala nobuholi bendabuko.
Okhulumela uMnyango wezo- kuThuthukiswa koMnotho kulesi sifundazwe, uMnu Bongani Tembe, uthe ungqongqoshe ugcizelele kakhulu ukubaluleka kokusungulwa kwalolu hlaka olunjengalolu.
“Lolu hlaka yilona oluzokwazi nokubiza imihlangano ukudingida izingqinamba ababhekene nazo. Luzophinde luqinisekise ukuthi kakukho ukuqhelelana okukhona phakathi kwabanikazi bamapulazi nomphakathi,” kusho yena.
Kuzokhumbuleka ukuthi phakathi kwezinto umphakathi wakuleya ndawo ozibalule njengembangela yentukuthelo yawo wukuthi ukhala ngokuthi uMnu Xulu, ubese eyisidumbu sesikhombisa ebulawa epulazini.
Umphakathi uthi kunezidumbu zamalungu awo ezike zatholakala zintanta emadamini phambilini kanti kwelinye uthe kwatholakala amathambo, ekubeni kunomfana okuthiwa washayiswa ngumnini pulazi ngogandaganda washonela khona lapho ngoba embambe entshontsha umoba.
Ukudutshulwa kukaMnu Xulu, kwenzeke ngoLwesibili epulazini iGqobhokani Farm, likadokotela owaziwayo eThekwini namaphethelo uDkt Fikile Christian Qhoboshiyane.
Unogada odubule uMnu Xulu, uqashwe yi-V1 Security, enikwe umsebenzi wokuqapha wonke amapulazi akhele iShowe namaphethelo.
Ekhuluma neLANGA, uDkt Qhoboshiyane, uthe bazimisele ngokuhlangana nomndeni kaMnu Xulu kodwa bacele umasipala ukuba ubaxhumanise uma kuwukuthi umndeni uyavuma ukuhlangana nabo.
“Siyafisa ukulekelela ngomngcwabo ngoba omakhelwane bayaphilisana. Siyafisa nokucacisa ukuthi unogada akaqashiwe yithi. Sizwelana nomndeni ngalesi sigameko esingafisi ukuthi siphinde senzeke,” kusho uDkt Qhoboshiyane.
Umufi uzofihlwa ngoMgqibelo kanti umasipala uMlalazi uzibophezele ekuthwaleni izindleko zomngcwabo. Kulindeleke ukuba umsolwa avele namhlanje ngoMsombuluko enkantolo kaMantshi eShowe.