KUDUNWE OWODUMO KWI-ARROWS
UNHLANHLA Mshibe ozakhele udumo egijima kwiLamontville Golden Arrows, udunwe imoto ngoMgqibelo ebusuku eMlazi.
UMshibe utshele ILANGA izolo ngeSonto ntambama ukuthi uyoyixoxela amagwababa echobana into emehlele. Uthe usuke enkundleni lapho bekubhekene khona iLamontville Golden Arrows ne-Orlando Pirates ngoMgqibelo ebusuku, ePrincess Magogo Stadium, KwaMashu, ehamba nabangani bakhe walibhekisa eLamontville beyozihlalela.
“Ngibe sengicelwa ngabanye abangani bami ukuba ngibahambise e- car wash kwa-D eMlazi ngoba bese kukhona abangazwani nabo. Ngithe nje ngibashiya kwaqhamuka abafana abayisi-7 bangikhomba ngezibhamu, bangifuna imoto. Bangiklinyile, bahamba nami bangidalakaxa kwa-B, khona eMlazi, bahamba ngemoto, bathathe imali, umakhalekhukhwini nokunye nje okuningi.
"Ngenhlanhla nje besanda ku- ngishiya, kuqhamuke uJaphet Zwane ngambikela udaba wangiyisa emaphoyiseni,” kusho uMshibe. Uthi imoto yakhe itholakale ishayisile kukhona isibhamu ngaphansi kwesihlalo somshayeli.
“Ngisola ukuthi bese behamba bebamba inkunzi ngayo ngoba kutholakale izimpahla obonayo ukuthi ziphucwe abantu. Imoto ( esesithombeni) yona kuphelile ngayo, angiboni ukuthi isazolungiseka. Vele lo mfana obengiphuca imoto, ubehluleka wukushayela sisahamba.
"Kungenzeka ukuthi ibachithile base bephuma bebaleka,” kusho uMshibe othi namanje usathukile.
Okhulumela amaphoyisa KwaZulu-Natal, uColonel Thembeka Mbhele, uthe likhona icala elivuliwe lokudunwa kwemoto eMlazi, wathi amaphoyisa asaphenya.